KPA: Accion di kita borchi no a para, sino ta continua awe

ORANJESTAD - E accion di polis y departamento DIP, di recohe borchi 'illegal poni' riba caminda publico, ta continua. Vocero di polis Lito Lacle a confirma esaki na NoticiaCla.com awe mainta. "E no a wordo para" Lacle a sigui bisa. E matutino 'Awemainta' a informa den su edicion awe cu e accion aki a wordo para. Pero Lacle a desmenti esey. E accion a cuminsa ayera y ta continua awe, dia 4 y 5 di mei proximo. E intencion ta pa remove borchinan mal ubica y sin permiso. Un di nan ayera tabata esun di partido MEP, cu anochi a ricibi esaki bek despues di haya multa. "Nos no sa ainda cuanto e multa lo ta" , lider di MEP, Evelyn Wever Croes a confirma na NC. Mas despues minister di husticia mes Arthur Dowers a confirma cu ningun momento a para e accion aki. "E ta continua" e mandatario a sigui bisa. 

ACCION

For di momento cu e accion a cuminsa diamars cu e accion, e la crea basta reaccion den comunidad. Esaki pasobra varios di e borchinan lo tabata poni riba tereno propio y erfpacht. Esaki sinembargo no ta duna e persona doño di e tereno, automaticamente e autoridad pa pone borchi, sino mas bien mester permiso di DIP toch, pa por pone cualkier borchi.