Rainbow Warriors: Na Aruba, no ta reconoce diversidad biologico como fundeshi di desaroyo sostenibel

Posted on 05/24/2023 3:03 am AST | Updated on 05/24/2023 3:09 am AST

ORANJESTAD - Na Aruba, contrario na loke Nacionan Uni y hopi pais den desaroyo of desaroya ta aspira, esta reconoce diversidad biologico como fundeshi di desaroyo sostenibel, na Aruba e fundeshi aki no ta ser reconoci. Asina e fundacion Rainbow Warrios ta alega den un comunicado. 

Segun e fundacion, construccion di Secrets Resort y e Masterplan Seroe Colorado ta muestra palpabel cu conservacion di biodiversidad no ta na prome lugar ora ta implementa desaroyo sostenibel (di turismo) na Aruba. Pero e peliger mas grandi na Aruba pa diversidad biologico ta algun departamento di Gobierno cu ta facilita codicia, hamber pa inverti placa (sushi) y gana placa di desaroyadornan sin escrupulo cu ta haci mofa di leynan existente, facilita pa un negoshi lucrativo di konkelmento cu tereno, hasta den terenonan cu ta oficialmente area proteha.

“ Nos ta menciona specificamente trahamento di Balashi Cabins den e area proteha Spaans Lagoen. Ademas nos tin un proyecto cu un lodge pa huur cu turista yama Across 28 den mangelnan na costa dilanti Bucutiweg 28 na unda a destrui mangel pa traha un tunnel pa yega na e water bungalow. Den area di Noord tin un proyecto yama Aruba Airstream Experience na unda a roza un tereno pa traha un proyecto cu titulo “nature retreat”.”:

Segun e fundacion, den tur tres caso no tin estudio di impacto ambiental haci cu input di ambientalista of otro stakeholder y ademas ta cuestiona seriamente si tur tres proyecto a ser duna permiso y of ta cumpli cu leynan pa proteccion di naturaleza.

Y finalmente, segun e fundacion, tin e discusion riba e “beach priva” di Embassy Suites by Hilton Aruba Resort, na unda segun diferente versionan no confirma Embassy Suites cu e expectativa pa han?a un beach priva a construi un tunnel cu ta pasa bou di caminda y ta sali net dilanti un area di fofoti cu segun nan opinion nan a ser duna luz berde pa por kita e matanan aki.

“ Den tur cinco caso nos mester constata iregularidad tanto di parti di DIP como DNM y falta di accion huridico di Fundacion Parke Nacional Aruba pa sikiera cuestiona y/of para e construccionan aki.

Y cu esaki ta keda irefutablemente demonstra cu mester cuminza un investigacion profundo den tanto DIP como DNM pa loke ta destruccion di naturaleza permiti, siendo cu tin leynan pa obedece y ambtenaar cu tarea asigna pa haci control y para actividadnan ilegal.

Tanten cu esaki no tuma lugar reconstrui diversidad biologico na Aruba lo no ta posibel” e fundacion ta sigui bisa. 

  • Alpina
  • Powered by SETAR