Oduber: Lo investiga asunto di ‘takelmento’ di auto di minister

ORANJESTAD – E hecho cu personal di seguridad di aeropuerto kier a ‘takel’ auto di un minister dialuna atardi, mesora a haya un ‘tinte politico’. E hecho cu no tin un claridad riba kico a sosode exactamente y cu algun declaracion ta parse contradictorio, a a pone cu lo conduci investigacion pa mira kico ‘realmente a pasa na aeropuerto, envolviendo minister Mike de Meza. E argumento inicial di e problema tabata, si e minister lo a wordo ‘privilegia’ pa motibo di su funcion y no lag’e paga e ‘multa’ ora di ‘takel’ un auto, of si e personal di seguridad a sigui e proceso corecto.

KICO A PASA

Diamars den dia, minister Otmar Oduber como mandatario encarga cu aeropuerto, a purba clarifica e situacion. E informacion cu tabatin ta cu ‘a pidi ‘e (minister de Meza) pa hala e auto na aeropuerto, y e no kier a hal ‘e’. Segun e mandatario (Oduber) , no mester ta asina cu ta privilegia un mandatario den un caso asina. E persona, ken cu ta, ta wordo pidi pa hala su auto ora cu esaki ta parkea na un lugar no corecto. E circumstancia segun Oduber a splica, tabata diferente dialuna debi na un mal funcionamento di machine pa tuma carchi pa e parkinglot. Esey a haci e parkinglot inaccesible, y cu posiblemente a conduci cu e colega minister lo a parkeer unda cu e la parkeer.

TAKEL AUTO

Segun Oduber, de Meza lo a yega pa busca algun persona familiar, pa cual e la para su auto un rato na e sitio menciona. E lo no a para ni un minuut (segun version di e minister), ora cu e grua di takel ya caba tabatin e auto cla poni pa hiba. Ora cu e mandatario en cuestion a yega na e sitio, identifica su mes y bisa cu e la bin pa hala e auto, e agente lo a nenga di cumpli cu e peticion. Loke tabata remarcable segun Oduber, ta cu e auto a keda poni cla pa takel pa casi 40 minuut, pero no a wordo hiba na unda cu normalmente ta hiba e autonan mal para. Segun e mandatario, esaki ta pone pensa cu tin algo su tras, pa asina por yama cierto medionan pa por saca potret etc.

META POLITICO

E informacion, cu ‘e mandatario no kier a paga e 75 florin di boet’, segun Oduber, no ta cuadra pasobra e version di de Meza ta cu e kier a paga, pero no tabatin su cartera cune e momento ey. Algo cu e agente di seguridad no kier a tende di dje, ‘pasobra lo tabatin otro metanan su tras’. De Meza e ora, enberdad a tuma contacto cu Oduber, cu na su turno a yama e director di aeropuerto ja cu segun e agente di seguridad, ‘esey tabata e unico persona cu por a autorisa pa ‘laga e auto bay’. E parti cu ta considera e asunto uno politico, segun Oduber, ta pasobra tabatin 5 auto mas para eynan, pero ta e auto di de Meza nan kier a uza. Oduber kier splicacion pa sa pakico a tarda tanto pa por a hiba e auto.

PROCESO PA PARKEER PA MINISTER

Pa loke ta e proceso di parkeer pa ministernan na aeropuerto, Oduber a mustra cu e ministernan tin permiso pa parkeo serca di aeropuerto. Como tal a haya e asunto straño, cu no a duna e minister e cortesia necesario, hasta ora cu e la identifica su mes corectamente. Loke tambe Oduber ta haya straño, ta cu e agente di seguridad no por a localisa e directornan di aeropuerto, ya cu Oduber si a logra. “Bo ta mira cu ta cosnan straño a tuma lugar den e caso specifico aki” Oduber a bisa.