Arends: "Nos ta condena venenamento di mascotanan inocente”

ORANJESTAD – Minister Ursell Arends (RAIZ) responsabel pa medio ambiente, a reacciona mesora despues di a tuma nota di un caso lamentable di venenamento di mascotanan na Aruba. Noticiacla tambe a raporta riba esaki diahuebs. “Ta cu tristesa grandi y preocupacion nos ta dirgi nos mes na un problema alarmante di 'hotdog' venenoso cu ta wordo duna na mascotanan den barionan di Aruba. Como minister encarga cu bienestar di nos animalnan, mi ta condena rotundamente e comportacion abominabel aki” e mandatario a cuminsa na bisa.

COMPARTI DOLOR  

Segun e mandatario, personalmente e ta comparti e dolor y e bashi cu famianan ta experiencia ora nan mascota ta wordo ataca cu actonan sin sentido manera esaki. E ta trece sufrimento y ansiedad pa e mascota y famianan tambe. “Mascota no ta solamente un compañero di cas, e no tey solamente  como "security-guard" na cas, e ta un miembro valioso den un famia y su bienestar ta hopi importante”. Segun e mandatario, nos mester uni como un sociedad pa proteha y asegura nan securidad. 

YAMADA CONTRA CRUELDAD

“Mi ta haci un yamada na cada un di nos pa para contra crueldad contra nos animalnan y mustra compasion pa nos amigonan di cuater pata” Arends a sigui bisa. Raporta cualkier actividad sospechoso cu bo bisiñanan y brinda e sosten na autoridad local den nan esfuerso pa captura esnan responsabel pa e acto contra ley aki.  Pues na esnan cometiendo e actonan aki reconsidera bo actonan pa so bo ta causando dolor den comunidad. “ Ademas mi ta encurasha e doñonan di mascota pa ta cauteloso, mantene un wowo alerto riba nan amigo keri y tuma prevencion necesario pa proteha nan for di posibel peliger. Nos comunidad mester rechaza e acto maligno aki y lucha pa un futuro caminda bondad, campasion y respet pa tur ser bibo ta prevalese” e mandatario a continua bisando.