Hendenan a bati alarma pa veneno poni riba varios caminda contra p.e cacho

ORANJESTAD – E siman aki algun doño di cacho na Aruba a haya nan confronta cu un fenomeno ‘nobo’ unda cu por poco nan cachonan a keda venena. Den e caso aki ta trata di dos cacho cu a haya nan mes venena, y ta danki na nan doño atento, nan a wordo scapa. E acto a sosode riba caminda na Budui, pero tin informacion cu tin mas area manera Babijn, Marawiel y Casibari unda cu a encontra artefacto cu ta poni pa venena cacho. Minister di Medio Ambiente responsabel pa asuntonan di cacho, Ursell Arends mesora a condena e acto aki. 

KICO A PASA

E persona afecta a splica e portal aki cu e tabata cana manera tur atardi cu su 6 cachonan, riba e ruta banda di Budui, tur na liña. Despues di a cana 2 ora, e la ripara cu dos di su cachonan a cuminsa actua straño. E doño a cuminsa bay cas mesora y na cas a spula nan boca cu awa, pensando cu ta sapo e cachonan lo a morde cu a causa e problema. Ora cu e la haci esey, e cachonan tur dos a cuminsa saca, y a sali pida hotdog den papel berde. E la warda esaki y pone e potret mesora riba FB. E condicion di e cachonan a bay atras hopi liher pa cual a yama veterinario na warda cu a yuda, cu asistencia di e casa di e persona, pa asina a logra scapa e dos cachonan afecta.

MAS LUGAR

Despues cu e dama en cuestion a raporta e suseso riba Facebook, e la haya reaccion mesora cu no ta ey so, sino cu mas caminda hendenan a cuminsa haya e tipo di cuminda riba caminda, cu veneno, y den cual caso algun tabatin final fatal lamentablemente. Esey kier men cu e hotdognan aki cu veneno a wordo poni riba varios caminda, y ta pensa cu ta for di dia di mama esaki ta tumando lugar pasobra e kehonan ta for di e tempo ey. Riba e caminda di santo pa e parti di Babijn, na pia di Seroe Cristal, y banda di e rooi pa bay Budui. 

HOPI BISHITANTE

A compronde cu riba e rutanan aki tin hopi hende ta cana cu nan cacho, y cu nan mester wordo alerta. E señora a sigui conta cu despues e la spuit e sushi di veneno for di su porch cu slang di awa. Y su mainta e la haya hasta soldachinan cu tabata muriendo. Pues ta asumi cu e resto di e veneno a keda y tabata basta fuerte. Ta pidi ciudadanonan cu ta frecuenta e areanan ey of otro area patras na Aruba, pa tene cuenta cu e situacion peligroso aki, sigur si ta bay e areanan cu bo mascotanan.