Parlamento: Downgrading di organonan consultativo inaceptabel

ORANJESTAD – Un ‘downgrading unilateral’ di organonan consultativo door di gobierno di Aruba ta inaceptabel pa parlamento. Esaki ta e mensahe cu prome minister Mike Eman a haya tempran awe mainta prome cu parlamento a cuminsa trata e presupuesto (lese aki) di e organo consultativo. E presupuesto mes di Raad van Advies (cu de hecho no a wordo mucho trata mes) a pasa awe tardi laat cu 11 voto na fabor y 7 contra. Pero, manera indica caba, gran parti di e dia a keda dedica na algo totalmente diferente: ‘cambio di rango’ osea un 'downgrading' di Raad van Advies. Prome cu a trata e presupuesto mes, mester a resolve e ‘problema’ aki. Y esey a tuma un Señoren Convent y casi 8 ora di debate, pa finalmente vota pa un mocion riba e tema (lesa e mocion aki). E mocion a keda rechasa cu 9 voto pro y 10 contra, pa despues pasa pa votamento di e presupuesto mes. Y si mester kere prome minister Mike Eman, e la priminti di ‘resolve ‘ e problema den un ‘memorie van toelichting’.

PRINCIPIO

E motibo cu e asunto a haya asina hopi atencion, ta pasobra parlamento a considera cu loke cu gobierno kier a haci, ('Gobierno kier a cambia e denominacion di Raad van Advies y otro colegio nan halto den ‘Colegio Fiho di Conseho’ ), algo cardinal y di principio y como tal no permisible. Ta conoci cu e organo aki ta haya su base den Staats Regeling y como tal, un gobierno no por cambia esaki unilateralmente, sin previo consulta. E conseho cu parlamento a ricibi riba e tema aki, tabata negativo riba e ‘conseho’ di gobierno pa cambio di e denominacion ‘nobo’ pa e.o. Raad van Advies.

NINGUN PROPOSITO

Segun e conseho legal aki busca pa parlamento, ‘ e cambio no ta sirbi ningun proposito’, y ‘no a wordo bon consulta’, y como tal ‘parlamento mester vota contra e proposicionnan aki di gobierno’. Segun e conseho, no a consulta cu nan ni cu e otronan. Esaki no ta solamente ‘sin gracia’, pero ‘no ta refleha e posicion unico di Raad’. Y mesun cos ta conta pa Algemene Rekenkamer. E hecho cu parlamento, cu tambe ta wordo considera como un ‘colegio halto’, segun e conseho, ta pone nan sospecha cu e proposicion di gobierno ta mas basa riba algo no pensa enves di un vision bon funda di e aparato publico. Cada lider di fraccion a duna nan comentario riba e asunto prome cu e reunion pa trata e presupuesto, mes a cuminsa.

REACCION DI FRACCION

Segun lider di fraccion di Democracia Real, Andin Bikker, e la pidi pa coregi e problema y restaura e nomber manera cu e tabata y deal cu e retonan grandi cu nos pais ta enfrenta. E ta referi na e.o. e confusion cu gobierno mes a crea door di cambia e nomber riba e.o. e website di gobierno mes, cu ta causa un ‘tegenstrijdigheid’ ora uza nombernan diferente riba e mesun website, denominando e mesun instancia. “Dus eigenlijk e propio gobierno ta contradeci su mes” Bikker a sigui bisa. Lider di fraccion di AVP, Rene Herde a bisa cu ta lamenta e ‘contradiccion cu nos a topa den documentonan”. “E no tin mag di sosode” Herde a sigui bisa. E la mustra tambe cu si cualkier instancia kier haci un cambio, e tin cu hacie den ‘e forma corecto den e pais aki. No via via” Herde a sigui bisa. “Nos ta urgi enberdad gobierno pa coregi e confusion aki mas lihe posibel den un pais unda cu tur hende mester por confia cu regla y ley ta cla y no tin contradiccion. Nos no por acepta esaki” Herde a sigui bisa. Pa loke ta lider di fraccion di MEP, Evelyn Wever Croes a bisa cu nan ta ‘exigi cu Raad van Advies mester wordo respeta’. E ta considera cu e cambio a sosode sin ningun ‘aanleiding, con nos tin cu bay yama e instituto aki di Raad van Advies”. E ta referi tambe na e memorie van toelichting unda cu ‘Staten van Aruba ta wordo jama un adviesorgaan’. “Nos no ta bay acepta esaki” Wever a sigui bisa. “Nos no ta permiti cu un wega infantil ta wordo hunga”, lider di e fraccion geel a termina bisando. 

PROME MINISTER

E prome mandatario di Aruba, Mike Eman na su turno a cuminsa pa yama e asunto aki como 'un confusion cu tabatin, y nada di algo intencional’. E ta referi na e cambiamento di e nombernan di e organonan consultativo. “Pa nos, Raad van Advies ta un Hoog College. E ta e instituto mas halto di pais Aruba. Nos a bin pa duna contenido na e pensamento aki sin cu e ley a wordo cambia caba” Eman a sigura parlamento awe mainta. Segun Eman, ta papia riba 'trompica riba palabra', pero ta contenido ta duna na un instituto. E la sigui mas bien pa describi e forma con nan ta traha cu e organo consultativo aki. A mustra cu no tabata e intencion pa mengua e funcionamento di autoridad cu e instituto aki tin. E la lamenta cu ‘den algun documento tabatin algun eror’. “Si tin cualkier confusion cu a bini, mi kier a sigura parlamento cu no tin ningun intencion pa kita ningun balor di e institutonan aki” Eman a continua bisando. Pa sigura parlamento di su intencion, Eman a sigui mustra cu ‘Raad van Advies por tin e titulo di Hoog College,  ya cu nan ta e collegio halto. Ami no ta bay hacie un principiele punt. Mi no ta kere cu nos tin cu drenta den un discusion pa kita nada di autoridad y posicion huridico y moral cu un RvA mester tin den nos comunidad’, e prome mandatario a finalisa bisando.