BCA: Comercio di Aruba ta mas optimista den prome trimester di 2023

 ORANJESTAD -  Banco Central di Aruba (BCA) a conclui e encuesta di percepcion di negoshi pa e di prome trimester di 2023. E encuesta di percepcion di negoshi ta evalua e percepcion economico di e negoshinan local.

Durante e di prome trimester di 2023, e asina yama ‘Business Perception Index’, cu ta consisti di e indicenan di condicionnan economico actual y condicionnan economico a corto plaso, a crece for di 105,2 te na 106,0 (mira Grafiek 1) . E resultado ta debi na un subida den e indice di condicionnan economico a corto plaso, mientras cu e indice di condicionnan economico actual a nota un bahada leve.

Fuente: Banco Central di Aruba

E indice di condicionnan economico a corto plaso a crece cu 1,8 punto di indice te na 105,1, compara cu 103,3 den e di cuater trimester di 2022. E indice di condicionnan economico actual a cay te na 106,7 den e di prome trimester di 2023 (Grafiek 2). E porcentahe di encuestadornan cu ta premira un crecemento economico positivo den e siguiente 12 luna a nota un caida leve di 0,2 punto di indice te na 43,6 porciento. 

Fuente: Banco Central di Aruba

E relato completo di e encuesta di percepcion di negoshi ta disponibel ariba website di BCA www.cbaruba.org

TOCANTE BANCO CENTRAL DI ARUBA

E proposito principal di Banco Central di Aruba (BCA) ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel. 

Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uzo di esaki.

Pa mas informacion tocante Banco Central di Aruba, por bishita su website  www.cbaruba.org