A detene 26 sospechoso durante listramento preventivo

ORANJESTAD - Durante e anochi di 25 pa dia 26 di april, diferente departamento di Cuerpo di Polis a traha hunto den un accion di listramento preventivo pa posesion ilegal di arma y droga. Den transcurso di e anochinan a traha den varios bario, manera specifica den e permiso cu Ministerio Publico a emiti y a detene 26 sospechoso di cual uno a pasa pa Warda Nos Costa y uno a keda deteni na Warda di Noord pendiente mas investigacion.

DETENCION LARGO

E persona cu a keda deteni pa mas tempo a wordo haya cu un revolver, tres bala cayente, cocaina y marihuana; e ta conoci pa husticia como un persona cu ta hopi peligroso y tabata sospechoso di tabata envolvi den pasado den atraco y asesinato.

ACCION

E accion di diasabra pa diadomingo tabata basa riba e maneho conoci como “faya bo haya” y a resulta den detencionnan pa posesion di arma di candela y arma blanco, posesion di marihuana y cocaina, pero tambe pa coremento di auto bao di influencia di bebida alcoholico, insulta polis den funcion y posesion di bala cayente.

KEN Y UNDA

Unidad riba motorcycle, K-9, Polisnan uniforma, Cuerpo Especial Arubano y Warda nos Costa tabata hunto den e accion di “preventief fouilleren” den bisindario di Circle K, Dakota, Madiki, Rancho, Rotonde Las Americas y algun area specifico den Oranjestad.

E meta cu e accionnan aki ta Polis por kita arma y droga for di caya y aumenta siguridad na Aruba. “Preventief Fouilleren” a resulta un instrumento bon uza y ta duna tambe bon resultado pa Polis.