Un lockdown na e prizon na Peru, ta dificultando proceso di extradicion di Joran vd Sloot pa Merca

LIMA – Un incidente na e prizon na Peru unda cu Joran vd Sloot (36) ta encarcela pa morto di e Peruana Stephany Floren, a pone cu e ta den un ‘lockdown’, esta cu a cera e prizon Challapalca hermeticamente di mundo, incluyendo comunicacion. Esey ta pone cu e abogado di vd Sloot Maximo Altez no por tin comunicacion cu su cliente. Y tanten cu esaki no sosode, e proceso di extradicion di vd Sloot pa Merca, no por continua. Esaki pasobra vd Sloot mester aproba e proceso di bringa e extradicion, cu ta un derecho cu e tin como detenido. Pa mas di un siman, e abogado no por a comunica cu su cliente, cu ta treciendo tardansa den henter e proceso. Manera cu Noticiacla.com a raporta caba, tin un urgencia pa traslada vd Sloot pa Merca pa e para pa e cargonan di extorsion y estafa, debi na e situacion delicado di un di e testigonan crucial di e caso.  Segun Altez, e lockdown ta prohibi e prisoneronan pa tin aceso na telefon of cualkier otro comunicacion fuera di persona pa persona.