- Departamento di Progreso Laboral (DPL) cu campaña pa entrega Formulario AMR 2023 den luna di Juni 2023
- Directie Financiën ta informa di e condicionan ora di trata cu cobransa pa instancianan di Gobierno
- Foyeto Abo ta bay studia dentro di poco na Hulanda – con pa registra den BRP
- DUCAPRO a presenta un plan pa promove e industria creativo y proteha e artistanan
- E prome barco di fruta y berdura di Venezuela ta yega Aruba dialuna awor
Gabinete Rutte ta sostene islanan CAS cu programa di inversion pa economia y transicion di energia
DEN HAAG - Hulanda ta pone programa di invershon disponibel pa e Paisnan Kòrsou, Aruba i Sint Maarten i pa Hulanda Karibense: Boneiru, Saba i Sint Eustatius. E invershonnan mester kondusí na e echo ku lo reforsá e potensial di kresementu ekonómiko, e independensia finansiero-ekonómiko di e seis islanan lo oumentá, e transishon di energia lo aselerá i standart di bida i di empleo lo mehorá. Ku esaki Gabinete ta duna kontenido na un di e palabrashonnan di e akuerdo di koalishon.
PROGRAMA DI INVERSION CORSOU, ARUBA y ST MAARTEN
Pa kontribuí na e desaroyo ekonómiko di Kòrsou, Aruba i Sint Maarten, Hulanda ta reservá un total di maksimalmente 200 mion euro di e Nationaal Groeifonds (NGF, Fondo Nashonal di Kresementu). Pa bini na remarke pa e medionan, e Paisnan por entregá proyekto ku demostrablemente tin un impakto grandi riba e abilidat di gana sèn duraderamente di e Paisnan. Un kondishon ta ku ta trata di proposishon kualitativamente bon pa proyekto riba e tereno di adaptashon di klima i transishon di energia, enseñansa, digitalisashon di gobièrnu, infrastruktura básiko (infrastruktura logístiko, purifikashon di awa i prosesamentu di sushi), produkshon di kuminda na kosto efisiente i hasi e ekonomia mas duradero (espesialmente turismo). Na promé instansia lo pone un tranche (un parti di un suma di sèn) di 100 mion euro disponibel. Si surpasá e montante aki ku proposishon di bon kalidat, ku ta kumpli ku garantia i kriterio ku mester determiná ainda, e ora ei un di dos tranche di maksimalmente 100 mion euro ta posibel. Despues di konsulta ku e Paisnan e lunan benidero, ta elaborá e programa di invershon.
TRANSISHON DI ENERGIA I AREGLO DI GARANTIA
Pa stimulá e transishon di energia na Kòrsou, Aruba i Sint Maarten por reservá rekurso SDE (Stimulering Duurzame Energieproductie en Klimaattransitie, Stimulashon di produkshon di Energia duradero i transishon di Klima) pa invertí den un òf diferente proyekto di kosto efektivo. Ta trata di proyekto ku mester bai duna un kontribushon supstansial na e transishon di energia di e paisnan. TNO den zomer ta start un investigashon pa reuní i klasifiká den ki medida tin proyekto posibel pa e stimulashon di produkshon di energia duradero i/òf redukshon di CO2. Aki ta trata di por ehèmpel e oumento di e kapasidat di energia solar i di bientu pa asina un gran parti di e produkshon di elektrisidat por tuma lugá duraderamente i na kosto mas abou pa kompania i konsumidó. E produkshon i eksportashon di hidrógeno asina tambe ta bira mas interesante.
Finalmente gabinete ta elaborá un areglo di garantia na midí pa stimulá e dunamentu di krédito na kompania salú na Kòrsou, Aruba i Sint Maarten. Un areglo di garantia ta yuda kompania ku muchu poko siguridat pa haña finansiamentu. Aktualmente ta falta un areglo asina segun ekspektativa na Kòrsou, Aruba i Sint Maarten. Kontrali na Hulanda, ta habri e areglo di garantia tambe pa kompania di por ehèmpel agrikultura i piskeria. Esaki ta nesesario pasobra e islanan pa berdura i fruta fresku ainda ta masha dependiente di importashon djafó.
HULANDA KARIBENSE
Boneiru, Saba i Sint Eustatius komo Hulanda Karibense ya kaba ta bini na remarke pa medionan tantu di e Fondo Nashonal di Kresementu, komo e SDE i un areglo di garantia. Pa mehorá e akseso na e areglonan di supsidio i e areglo di garantia, pa e islanan aki ta entregá trabou na midí.
For di e NGF gabinete pesei ta pone 30 mion euro disponibel pa Hulanda Karibense i e ta desaroyá un programa separá pa reforsá e abilidat di gana sèn duraderamente di Hulanda Karibense. Pasobra Boneiru, Sint Eustatius i Saba, meskos ku e Paisnan, tin un struktura ekonómiko vulnerabel ku ta masha dependiente di turismo i importashon, e temanan pa e programa di invershon aki pa Hulanda Karibense lo ta komparabel ku esnan pa Kòrsou, Aruba i Sint Maarten.
Pa Hulanda Karibense na sèptèmber di aña pasá a pone 33,6 mion euro disponibel for di e medionan di SDE i e Regio Enveloppe (Ènvelòp Regional). Ku esaki ta ehekutá proyekto na midí kaba pa hasi produkshon di energia sostenibel. Na e momento aki entre otro ta konstruí un parke solar nobo na Boneiru, ku mas di 10 mil panel solar, sufisiente pa 5000 kas di famia.
Kompania na Hulanda Karibense aktualmente ta hasi tiki uso di e Borgstelling MKB kredieten (BMKB, Para bòrg di krédito di kompania mediano i chikí), no opstante ku a adaptá e regla na konteksto i petishon lokal. Huntu ku e Entidat Públiko lo pone e areglo di garantia aki mas bou di atenshon di e kompanianan i e finansiadónan bankario i no bankario. Asina e dunamentu di krédito na e komersio lokal por oumentá pa asina esakinan por invertí mas.
KONTINUASHON
E lunanan binidero lo elaborá e tres programanan pa e Paisnan Kòrsou, Aruba i Sint Maarten mas aleu i lo desaroyá mas trabou na midí pa Hulanda Karibense. Promé ku zomer lo start kombersashon ku e Paisnan i Hulanda Karibense pa palabrá e kuadronan di kontenido di e tres instrumentonan. Tambe lo mira di ki manera por sostené e Paisnan i Hulanda Karibense na un manera efektivo den e desaroyo i ehekushon di proyekto. NOTA: E texto ta scirbi den Papiamento fonetico di Corsou.
Delegacion di Aruba ta na Hulanda caba pa Reunion Interparlamentario di Reino (IPKO)
DEN HAAG – Manera cu Noticiacla a raporta caba, di diahuebs awor, 1 di juni pa dialuna 5 di juni 2023, Reunion Interparlamentario di Reino (IPKO) ta tuma laga na Den Haag. Durante IPKO, e delegacionnan di Aruba, Curaçao y Sint Maarten y Hulanda ta reuni pa debati riba tema cu ta afecta e paisnan den Reino. E temanan di e IPKO aki ta cambio climatico y adaptacion na esaki, educacion, e proximo Conferencia di Reino, seguridad di data den Reino y superacion y procesamento di colonialismo y pasado di esclabitud.
Hulanda preparando pa comienso di reunionan di IPKO na Den Haag e siman aki
DEN HAAG – Hulanda ta preparando pa ricibi Parlamentarionan di Aruba, Corsou y St Maarten e siman aki pa reunionan Interparlamentario di Reino Hulandes, conoci como IPKO. E reunionan ta tuma lugar di diahuebs 1 di juni 2023 te cu dialuna 5 di juni 2023. E reunionan lo ta presidi e biaha aki pa presidente di comision fiho di Relacionan di Reino di Tweede Kamer, esta Mariëlle Paul (VVD), riba temanan comun cu ta toca e paisnan mnciona. Temanan den e reunion aki ta entre otro cambio di clima, enseñansa, e conferencia pendiente di Reino, seguridad di data dentro di Reino y e proceso di kolonialismo y pasado di sclavitud. NOTA: E potret ta di e ultimo reunion di IPKO cu a tuma lugar na Corsou na februari di e aña aki.
Video: Hulanda ta insisti riba recorte completo di 60 miyon y ta warda si wak Aruba lo cumpli
DEN HAAG – Aruba tin cu cumpli cu e recorte di 60 miyon florin riba gasto di salud pa 2023 y mas despues. Diabierna (awe mainta) e secretario di estado Hulandes Alexandra van Huffelen a bolbe confirma esaki den un contesta na Noticiacla. E mandatario no tabata cla si pa informa kico e consecuencia ta si Aruba no cumpli fin di aña. E mandatario a splica esey den e entrevisa cortico cu e portal awe mainta. Ademas, e mandatario a toca e tema di RAFT (manera relata den un articulo anterior riba e portal) unda cu ainda ta wardando un reaccion di gobierno pakico Aruba no ta di acuerdo cu e contenido di e RAFT.
Van Huffelen: Hulanda no sa ainda pakico Aruba ta contra e concepto di RAFT
DEN HAAG – Ta mustra cu tin un problema di comunicacion entre Aruba y Hulanda pa loke ta e tema di ley di reino di supervision financiero, conoci como RAFT. Dos luna premier di Aruba a bisa cu Hulanda ta na mesa cu Aruba pa negosha riba e tema. Y ta conoci cu Aruba tin problema cu e ley. Sinembargo awe diabierna mainta, a resulta cu Aruba ainda no a informa Hulanda kico e problema ta. “Gobierno di Aruba mester informa nos riba esey ainda” secretario di estado Hulandes Alexandra van Huffelen a bisa Noticiacla diabierna mainta den un entrevista cortico cu e mandatario. Pues mientras cu ta negoshando, toch ainda Hulanda no sa kico e problema pa cual Aruba no kier acepta e ley aki, ta. E ley ta condiciona na refinanciamento di e debe di Covid cu Aruba mester paga Hulanda bek e aña aki y ta algo cu Aruba a admiti dos luna pasa tambe. “Nos a palabra anteriormente cu nos ta bay traha un ley di Reino pa supervision financiero, y e reaccion di Aruba no a wordo manda pa nos (ainda)” van Huffelen a bisa. “Mientrastanto nos a informa nan tambe cu nos no solamente ta haya cu e ley mester bin, pero cu e ley ta condiciona na palabracion riba refinanciamento di e sosten di likidez” van Huffelen a bisa. Lamentablemente, Aruba segun e mandatario, on a informa Hulanda nada.“Pero riba esey, Aruba ainda tin cu informa nos ariba” e mandatario a finalisa bisando.
CAFt: Aruba ta rekeri reforma y esfuerso firme pa cumpli miho riba corto plazo
DEN HAAG – Aruba ta rekeri reforma y esfuerso firme pa mehora cumplimento fiscal riba corto plazo. Asina e colegio di supervision financiero pa Aruba CAFt a bisa secretario di estado Hulandes Alexandra van Huffelen durante nan bishita e siman aki na Hulanda. Di 22 pa 24 di mei 2023 e Colegionan di supervision financiero a haci un bishita di trabou na Hulanda. Aya nan a reuni cu Secretario di Estado di Asuntonan Interno i Relacion den Reino, Secretario di Estado di Finansa, e miembronan di Eerste y Tweede Kamer, e Ministernan Plenipotenciario, Controlaria General (Algemene Rekenkamer) y Conseho di Estado (Raad van State). Durante e combersacionnan a papia tocante un trayectoria plurianual pa logra un finansa publico sostenibel y e prioridadnan principal relaciona cu esaki pa e paisnan y entidadnan publico den Caribe.
Minister Hulandes Franc Weerwind di Proteccion Hurdico ta bishita Aruba otro siman
DEN HAAG - Minister Franc Weerwind di Protekshon Hurídiko ta hasi Boneiru, Aruba i Kòrsou un bishita di trabou di 21 pa 27 di mei. E bishita ta prinsipalmente den kuadro di sera konosí i den su ròl komo e persona responsabel pa diferente parti di sistema riba tereno di Hustisia i Siguridat. Tambe e ta hiba kombersashon tokante e pasado di sklabitut.
Follow NoticiaCla
