Parlamento no ta logra trata ley pa cobra BBO na frontera, prome cu 1 juni 2023

ORANJESTAD – E ley cu tin cu percura cu por implementa cobransa di BBO na frontera entrante 1 di juni 2023, no ta logra pasa prome cu e fecha ey mas. Asina presidente di parlamento Edgar Vrolijk a confirma na Noticiacla diamars. “E no ta haalbaar nunca pa 1 di juni (2023:red)” sr Vrolijk a contesta e portal mas specfico. Mas pio ainda, no a mira e ley mes ainda. Ora cu e portal aki a puntra si e ley a sikiera drenta pa wordo trata, sr Vrolijk tabata hopi corto :” No, nada no a drenta!”. Esaki kier men cu contrario na planificacion e introduccion no ta sosode mas pa 1 juni di e aña aki. A lo menos cu haci algo cu por ‘speed up’ esaki toch di otro forma, manera cu a haci den pasado.  DIMP mes a informa e portal aki diamars, cu enberdad tabata planea pa drenta na vigor pa e fecha aki. A informa tambe cu nan no tabata na altura cu e ley lo no a keda cla pa pasa pa e fecha menciona. Ademas, DIMP a splica tambe cu no ta asina cu e por wordo introduci cu forza retroactivo. Esaki ta nifica cu lo mester pasa e ley despues pa e drenta na vigor un luna mas laat. 

E LEY TA LAAT

Tabata diamars cu den un conferencia di prensa di Aruba Trade & Industry Association (ATIA), cu su director sr Herrick Henriquez a recorda cu falta apenas 17 dia pa e fecha di introduccion, y ainda e gremio no a ricibi e concepto final di ley, no obstante cu a haci promesa na maart cu esaki lo ta e caso. E ley lo tabata ‘pega’ ainda na Raad van Advies segun informacion cu sr Henriquez a haya. A base di esaki, noticiacla a bay averigua cu Parlamento si porta e la yega eynan caba si. Pero e contesta tabata negativo. Segun Henriquez, ora sina nan lo core pasa esaki lihe lihe toch, manera cu a yega di pasa den pasado na December ora cu a core pasa un ley net prome cu aña bolter. 

PAKICO NO POR TRAT’E AINDA 

Mientras cu ta parce cu den 17 dia por tin suficiente dia pa pasa e ley ainda, e realidad ta otro. E presidente di Parlamento a recorda e portal aki cu cada ley tin un caminda pa cana.” Mi tin proceso pa atende y mi ta mantene mi mes na mi normanan pa duna espacio di minimo 2 siman pa un ley asina pa hasi pregunta(presupuesto 3 a 4 siman)” Vrolijk a sigura e portal aki.