Merca tin pura pa extradita vd Sloot for di Peru debi na estado di salud di un testigo crucial na Merca

ALABAMA – Pronto lo tin un session special na Peru pa trata e extradicion di Joran vd Sloot di Peru pa Merca. Asina ex Procurador General di e districto norte di Alabama, Jay Town a bisa. Siman pasa a bira conoci cu gobierno di Peru a aproba pa e extradicion tuma lugar. Mientrastanto Associated Press ta raporta cu e motibo pa acelera e proceso di trata e caso di extorsion contra vd Sloot, ta pasobra un testigo crucial ta den estado di salud delicado. “Un tardansa den e proceso, lo por debilita e chens pa un condena” ta poni den e sentencia cu a cay siman pasa. Tambe a bira conoci cu ta sali for di e punto di bista cu vd Sloot unabez na Merca, lo permanece 2 aña eynan maximo, cu ta inclui un apelacion si dado caso e caso no bay na fabor di e autoridad Mericano. Y pesey ta importante, teniendo na cuenta e salud di e testigo crucial, pa esak tuma lugar awor. 

NEGOCIA

Peru lo negosha cu State Department na Merca y departamento di Husticia, di con lo transporta Joran vd Sloot pa Merca. Ta premira cu agentenan federal lo biaha pa busc’e of tope na un terminal internacional na caminda pa Merca, pa unabez na Merca, nan drenta cu ne den e edificio di Corte di Husticia Federal na Birmingham, Alabama unda cu e lo keda procesa. E lo keda eynan te ora cu su caso bin dilanti. Unabez sinembargo, cu e sentencia cay, e lo bolbe Peru, pa sinta e resto di su sentencia pa e morto di Stephany Flores, cu lo ta te 2040 si e no haya un liberdad mas prome. Si sentencia vd Sloot, e por haya un sentencia maximo di 50 aña. Esey ta 25 aña pa cada cargo cu tin contra dje na Merca, esta di extortion y estafa.    

TEMPO

Merca tin 30 dia pa prepara e documentacion pa extradicion di vd Sloot for di Peru, for di momento cu gobierno Peruano a aproba e extradicion. Unabez cu e documentacion ta cla, e extradicion por dura entre 1 dia pa 1 siman. Mas cu e por dura ta te July of Augustus di e aña aki. Joran vd Sloot lo sea wordo transport cu un avion di gobierno Mericano, of un avion comercial, acompaña pa agentenan federal di FBI. 

E ABOGADO 

E abogado di vd Sloot, Maximo Altez ta bisa cu e no ta confia e sistema hudicial Mericano. E ta kere cu Merca lo añadi cargo di homicidio na su cargonan di extorsion. “Nos no ta bringando e inocensia di Joran. Nos ta bringando pa su derechonan wordo respeta” Altez a finalisa bisando.