Gerlien Croes a retira di AVP y a bay cu su asiento tambe

ORANJESTAD – Casi un luna despues cu e la publicamente confirma su disgusto cu e partido politico AVP, di cual e tabata forma parti, awe dialuna Gerlien Croes formalmente a anuncia su retiro di e partido. Den un carta dirigi na e lider di partido Mike Eman, cu ta den poder di Noticiacla, Croes ta entrega su retiro di e partido oficialmente, y ta sigura mesora si cu e ta keda den politica. Aunke den e carta e no ta bisa si si e ta keda cu su asiento, Croes a confirma na Noticiacla cu e ta keda cu su asiento.  “Mi a yega na e na e conclusion cu no ta keda mi persona otro alternativa di distancia mi mes di Partido AVP, entregando mi retiro, considerando cu mi no ta reconoce mi mes mas den e vision y forma di pensa y hiba politica di Partido”. 

DIFERENCIA DI OPINION

Segun Croes, despues di e ‘episodio’ den Parlamento cu a cuminsa tur e problema aki, unda cu miembro di partido Mike de Meza a bagatalisa e y colega Ryçond Santos do Nascimento publicamente, e la sigui purba papia, pero no a logra. ;’Asina mes lamentablemente e diferencianan di opinion y pensamentonan den e organisacion a keda aumenta y no solamente ta haci e situacion mas complica pero tambe frustrante pa mi funcionamento den partido y fraccion” e ta sigui bisa den su carta. E ta confirma cu ta e incidente den Parlamento cu De Meza, ‘a culmina na un etapa unda cu hasta mi principionan como persona a wordo cuestiona y atacha”. Lesa e carta completo AKI.