Grupo di mayor ta entama caso contra SKOA

ORANJESTAD – Un grupo di mayor ta bay hiba Stichting Katholiek Onderwijs Aruba (SKOA) corte pa motibo di e asunto di aumento di cobramento di schoolgeld pa e proximo aña escolar. Esaki nan a dicidi despues di a reuni cu SKOA diabierna ultimo den un reunion. Mientrastanto a mustra cu ta urgi mayornan pa no paga e suma ainda, pendiente di e caso, y ‘no laga nan presiona e mayornan riba e caso aki’.

SKOA

Tabata durante e reunion cu e grupo aki, cu SKOA (segun e presidente di e grupo, Luigi Bergen) a bisa e grupo cu tin 60% caba di mayornan cu a paga e suma. Pero segun Bergen, esaki no ta hustifica pa sigui cu esaki. Como tal a bisa cu mirando e conclusion di e reunion, cu lo hiba SKOA corte den un caso sumario pa trece claridad riba e asunto aki.

KICO A SOSODE

Manera raporta inicialmente, e grupo di mayor,  a pone cu si pa diabierna ultimo e ‘Comision di Mayor’ y Stichting Katholiek Onderwijs Aruba (SKOA) no haya otro, e comision tabata bay hiba SKOA corte. Asina e representante di e comision di mayor, Luigi Bergen a declara diamars siman pasa. E ta e resultado di un reunion cu a tuma lugar entre e dos partidonan aki na comienso di e siman cu a pasa. E topico tabata ‘re-inscripcion di cada alumno na scol di SKOA. En especial e pago escolar di 250 florin pa garantisa cupo na dicho scol, cu e alumno ta bishita pa aña escolar 2015-2016. 

RE-INSCRIPCION

Den e reunion SKOA a indica cu re-inscripcion semper tabata existi y cu no ta tur scol tabata aplik’e. Tur tres mayor, cu cada uno tabata tin tres yiu na scol di SKOA pa mas di diez aña caba, no ta reconoce esaki. Sigur unda cu e re-inscripcion ta mara na cualkier pago. Segun e comision, awor SKOA ta indica cu pago escolar ta pa garantisa cupo di e alumno na su scol pa aña escolar 2015-2016. “ Nos a indica cu esaki ta e prome punto cu nos no ta di acuerdo cu ne. Door di esey y silencio di SKOA nos a acerca un abogado. Door cu SKOA no tabata tin su hurista/abogado presente a pidi pa schors e reunion” Bergen a bisa.

ACLARIACION

Prome cu a schors e reunion, e comision a puntra pa aclaracion riba entrega di cuenta anual di SKOA di diferente aña. Cuenta annual di aña 2011, 2012 y 2013 ta atrasa y no ta entrega serca Gobierno. Esun di 1998 te cu 2010 si ta entrega y mester wordo controla y ‘verrekend’ door di Gobierno. Na 2014 Gobierno a subsidia 80% di e presupuesto di SKOA y no 90%. Na 2015 SKOA a ricibi un suma di 500 mil florin pa cubri e resto di 10% pa yega na e 90% cu mester wordo subsidia.

OTRO TOPICO

Otro topico cu a papia riba dje sin profundisa ta uzo di contribucion di mayor, ‘aircogeld’, leermiddelen y onderhoudsgeld. A keda palabra e ora ey cu e reunion mester a continua diabierna ultimo 24 di April. “ Nos obhetivo mas importante den e fase aki ta pa garantisa cupo di cada alumno na su propio scol pa aña escolar 2015-2016 separa di cualkier pago. E ora nos por papia riba e cobransa di inhusto di 250 florin” Bergen a bisa. Di otro forma pues, lo topa otro den corte. Y esey a bira realidad awo.