Homber hoga na Baby Beach identifica pa ‘colega’ illegal

ORANJESTAD – E homber cu a wordo haya ta drief na Baby Beach siman pasa, enberdad ta un di e personanan cu a purba drenta Aruba illegal. Esaki vocero di ministerio publico, Ann Angela a confirma na NoticiaCla.com. Siman pasa ora cu un turista a haya e persona aki durante un paseo di snorkel, no tabatin mucho detayes di dje. Mientrastanto a identifica e homber como F.N.F. di 40 aña y di nacionalidad colombiano.

DETENCION

Angela a confirma tambe cu di e grupo cu a drenta, a detene solamente 2 persona. A hiba tur dos persona pa wak e curpa di e persona colombiano, y akinan un di nan a identifica e homber como parti di e grupo cu a yega Aruba di forma illegal. “Uno a nenga pero e otro si a identifik’e” Angela a sigui bisa. Mes momento Angela a bisa tambe cu no tabata necesario pa haci un autopsia riba e curpa, pasobra no tabatin indicacion di cu e lo a muri di un acto sospechoso.

E SUSESO

Tabata siman pasa cu curpa di un persona hoben a wordo haya na Baby Beach, y prome instante tabata sospecha caba cu probablemente ta di un persona cu a purba drenta Aruba illegal, pero no a logra. Tabata den oranan di marduga un grupo di persona indocumenta a subi tera na altura di Baby Beach. Den e proceso aki, un di e personanan lo a hoga, pa cual a haya su curpa awe mainta ta drief. Un turista cu tabata 'duik' eybanda a haya e curpa ta drief. 

KICO A SOSODE

Segun vocero suplente di polis Liliana Rasmijn a informa NoticiaCla.com te tempo ey, polis a haya e melding 10'or na Centrale Post. E melding tabata cu un turista a bay snorkel, y a topa cu e curpa ta drief. Mesora a avisa polis maritimo cu a bay na e sitio y saca e curpa. Pa 10:55 docter Line a constata morto di e persona. Segun Rasmijn, no por a saca afo ken e persona ta. Unico informacion suministra, ta cu e ta un persona masculino di entre 30 y 40 aña. Mes momento e la confirma cu un grupo di persona mas prome a subi tera na altura di Baby Beach tambe. A sigui pa detencion di e personanan aki. A dicidi e ora cu lo hiba e personanan deteni illegal, pa wak e curpa y wak si nan ta 'reconoce' e persona.