SNBA a habri afo contra huez y habitantenan cu kier stroba proyecto di Secrets Hotel

SAN NICOLAS – E gremio di representacion comercial di San Nicolas, San Nicolas Business Association (SNBA) a habri afo riba e hecho cu un huez di Corte di husticia y un grupo di ciudadano ta strobando e proyecto hotelero conoci como Secrets di Three Rivers Real Estate, na Baby Beach. A dicidi di plantea e crisis di parti comercial. “Nos lo haci tur cos cu tin pa realisa e proyecto aki” e presidente Errol de Freitas a sigura Noticiacla diabierna mainta. Y si esaki kier men bay corte, nan lo haci esaki tambe, pa bringa e keho di e ciudadanonan y decision di huez cu ta stroband e proyecto aki. 

PROTESTA 

Segun   de Freitas, ora cu tin proyecto hotelero pabou di brug, ningun hende ta protesta y no tin e problema aki. Segun de Freitas, a dicidi di habri afo contra e grupo di ciudadano cu pa motibo cu e hotel lo ‘stroba nan bista’ kier ‘para un catalisador comercial pa turismo’ di bira un realidad. De Freitas a pidi disculpa pa tabata emocional durante e conferencia diabierna mainta, pero e la splica cu nan ta cansa di e forma di proceder ora cu ta trata un proyecto di San Nicolas. 

CRITICA

Segun de Freitas, nunca e gremio a opta pa ta esun cu ta critica y halsa boz. Semper nan a busca e caminda corecto y positivo pa trece tur cos dilanti y ta wak e parti positivo. Entre otro durante e pandemia. Pero awor esaki a bira di mas pa nan y a dicidi di bin afo y mustra nan descontento serio contra e accionan cu ta tumando lugar contra e proyecto hotelero, cu segun de Freitas ta algo hopi positivo pa Aruba.

VEREDICTONAN DI HUEZ

Segun de Freitas, ta mira e veredictonan di huez riba casonan cu a bin dilanti anteriormente pa para e proyecto hotelero. Segun e presidente, 7 huez den pasado a desbarata e ponencianan di e ciudadanonan malcontento, pero tabatin uno cu a bin ‘habri e pandoras box atrobe’ cu por habri full e cos aki den un aspecto negativo, pa motibo di un tussenvonnis cu ta bisa cu mester ‘shut down’ e proyecto te ora cu cos clarifica. E ta sigura cu tur rapport a wordo trata y traha riba e proyecto, incluyendo di medio ambiente.