Chauffeur cu a causa accidente cu 3 morto, sentencia na 4 aña di prizon

ORANJESTAD – Corte diahuebs a sentencia e homber Wilson cu aña pasa October a causa e accidente di trafico fatal aña pasa na Seroe Colorado, na 4 aña di prizon y 5 aña sin por core auto. E accidente a laga 3 persona morto di cual dos tabata e rumanan muher Joanna y Mirella Wouters y un baby di 2 aña Rendrick Wouters. 

E CASO 

Tabata diadomingo 2 di October 2022 pa 10.35 cu central di polis a wordo notifica di un acidente basta grave den Seroe Colorado.Na yegada di patruya a pidi pa un ambulance y materialwagen cu maximo urgencia mirando cu den un di autonan tabatin 3 persona cu no tabata duna señal di bida y cu tabatin 4 persona mas gravemente herida.Diferente Ambulance a yega na e sitio y transporta 3 mucha ( 10 luna, 3 aña y 5 aña) y un hende mayor di edad cu maximo urgencia pa hospital.  Pa 11.28 Dokter De Cuba a constata morto di e tres victimanan. E morto a causa conmocion na Aruba mirando e tragedia cu a laga un famia hopi destrosa pa e perdida grandi den un solo tiro.