Eman(AVP): “Nos lo lucha contra cierre di John Wesley College!”

SAN NICOLAS - “Nos lo lucha contra cierre di John Wesley College!”. Asina lider di partido AVP Mik Eman a bisa diaranson despues di a bishita e scol.  Tabata diaranson ultimo, cu Eman a bishita John Wesley College pa conoce e situacion di e cierre di e scol secundario y pa scucha e studiantenan nan preocupacion pa cu e cierre aki. Diahuebs mainta Eman a duna un declaracion na prensa den cual ta urgi y responsabilisa Gabinete Wever-Croes pa e destino di e instituto educativo na San Nicolas, su personal y studiantenan. 

PREOCUPA

“Nos a keda hopi preocupa,” asina Eman a bisa. “E scol ta historico den hopi sentido. Su balor pa San Nicolas ta sumamente grandi.” E politico di oposicion a comenta na media cu ta un cantidad enorme di ciudadano prominente, te hasta internacionalmente conoci, a gradua di e scol aki. Como ehempel el a duna Sarah Wescott, kende dia el a bishita Aruba como Promer Minister, nos a pone riba su ruta di bishita pa pasa na e scol y recorda parti di su hubentud y experiencia eynan. “E scol aki tin un balor hopi grandi,” Eman a expresa.

RELIGION

Adicionalmente, John Wesley ta un nomber cu tin un nificacion grandi den e religion Methodista, cu ta uno cu presencia prominente den San Nicolas y na Aruba. John Wesley ta fundador di e denominacion cristian Methodismo, Eman a splica. Tambe e lider di oposicion a accentua cu John Wesley ta tambe author di letranan di Fe cu mas di 200 anja ta inspira den iglesianan tur rond di mundo.  

EFECTO NEGATIVO

Eman ta mira como un efecto hopi negativo pa e cantidad di studiantenan cu e scol tin ta cu aña pasa a aumenta e tarifa di schoolgeld di 350 florin pa 650 florin, mientras cu algun meter leu bo ta haya un Abraham de Veerschool cu ta cobra keto bay 350 florin. Naturalmente, esaki ta pone John Wesley College  den un posicion dificil di competencia caminda cu mayor ta bay scoge pa un scol mas menos costoso. Locual ta logico den un un tempo asina dificil. 

CIFRANAN REAL

“E cifranan cu gobierno ta hunga cu ne y e realidad penoso cu nos pueblo ta biba awe a bati na porta di John Wesley.  Pa AVP, loke ta sosode aki ta totalmente inaceptabel. Ta responsabilidad di Gabinete Wever-Croes II pa trece partidonan hunto y wak unda por yuda pa e scol aki por keda existi pasobra San Nicolas no por permiti cu mas cos ta cera pariba. “E señal aki ta uno sumamente negativo pa San Nicolas y su pueblo,” asina Eman a finalisa bisando. E lider di oposicion a finalisa bisando cu “nos lo lucha contra cierre di John Wesley College, nos a priminti e studianten cu nos lo “put up a fight” pa nan school keda habri.