Abogado Ruiz y Arulex ta entrega keho na OM contra periodistanan Paskel y Andrade

ORANJESTAD – E abogado Anthony Ruiz y e compania Arulex ta entrega un keho penal contra e portal 24ora, y e periodistanan Patrick Paskel y Nelson “Speed” Andrade, na Ministerio Publico, pa smaad, laster en haatzaaiing. Osea traduci entre otro difamacion, calumnia y instiga odio. Esaki ta basa, segun Ruiz, cu esnan menciona, den e programa radial Enfoke y riba e portal menciona, ‘deliberadamente a haci declaracionan infunda cu por tin consecuencia grave’. E declaracionan tin di haber cu e relacion cu Arulex tin cu e proyecto hotelero Secrets na Seroe Colorado. Particularmente cu nan (Arulex)  lo no a tene nan mes na un sentencia di huez, unda cu e huez lo a para e trabou di construccion di e hotel, pendiente clarificacion riba e permiso di construccion cu lo tin pa haci e trabou. Arulex ta maneha e asunto pa e compania legalmente, y ta aki ta unda cu e acusacionan a bin, indicando cu tanto e abogado actuando como director, lo a hala e sentencia di huez un banda y laga e construccion di hotel continua toch, no respetando sentencia di huez. 

DECLARACION

Den e declaracion haci tambe, Ruiz y Arulex ta splica cu e compania (Arulex:red) ta un compania cu ta fungi como trust service provider. “Pa por duna tur servicio relaciona cu esaki, Arulex a ricibi un vergunning di Centrale Bank van Aruba, y ta bou di supervision continuo di Centrale Bank van Aruba” e declaracion ta sigui bisa. “Arulex ta mantene su mes dentro di e margen di ley y den cuadro di esaki, ta respeta sentencia di huez. Como director, Arulex no ta dicidi pa ningun compania, sin consulta prome cu su client como cu tin regla cu ta aplica entre e trust service provider y e client y Arulex ta tene su mes na esaki”, declaracion ta sigui bisa. 

REACCION PERIODISTANAN PASKEL Y ANDRADE

For di e dos periodistanan cu ta wordo demanda, noticiacla tambe a haya un reaccion. Segun e dos periodistanan, abogado “Anthony Ruiz ta un abogado haragan, golos y yoron”. Segun nan, ‘Ki ora critic’e, e ta core bay yora na recherche’. “ No ta prome biaha e ta bay y semper ta harie. Nos a haci nos trabou di señala, cu bo no por ta abogado di un proyecto hotelero, bo mes ta director tambe y di otro banda bo ta huisadvocaat (of consehero) di e mesun minister cu ta otorga tereno of permiso di construccion. Esey ta haci bo haragan golos. Y ora gara bo den e conflicto di interes, e ora kier bay recherche pa entrega keho…cu ta haci bo yoron tambe!” e dos periodistanan a finalisa bisando.