Milly Schwengle ta retira como representante di RvS pa Aruba

DEN HAAG – Despues di a eherce su funcion pa 6 aña, gobierno di Aruba a informa cu entrante 1 di november 2023, sra. Mildred Schwengle, miho conoci como Milly, a base di su propio peticion, ta retira di su trabou como representante di Raad van State (RvS) pa pais Aruba. Sra.  Schwengle pa seis aña a exactamente a fungi como miembro di departamento di RvS di Reino. Prome cu sra. Schwengle a asumi e responsabilidad aki, dr. Mito Croes tabata ocupa e funcion di representante di RvS pa Aruba te cu juni 2016.

PROCEDURA

Ken lo asumi e funcion despues di sra. Mildred Schwengle ainda no ta conoci. Minister di Asuntunan Interno y Relacionnan di Reino di Hulanda lo consulta esaki cu Prome Minister di Aruba Evelyn Wever - Croes y cu e vice presidente di RvS. Conseho di Minister di Reino lo tuma e decision pa presenta e candidato na Rey Willem-Alexander, pa e nombracion como representante di RvS.

DEPARTAMENTO DI CONSEHO DI  REINO

E departamento di conseho di RvS di Reino Hulandes ta reuni un biaha pa luna, riba diaranson, y ta duna conseho den liñanan grandi tocante e mesun temanan cu e departamento di conseho di RvS. Cerca RvS di Reino e ta bay tocante topiconan no solamente di interes pa Hulanda, pero pa henter Reino entre otro: Leynan di Reino y tratadonan di Reino. E departamento di conseho di RvS di Reino ta consisti di miembronan di e departamento di conseho, plus tres otro miembro di e otro paisnan den Reino. 

SU INICIO

Tabata na 2016 cu Conseho di minister di Reino a aproba pa propone mr. Milly Schwengle na Su Mahestad Rey Willem Alexander pa bira e proximo miembro di 'Conseho di Estado di Reino' (Raad van State van Koninkrijk). E lo mester representa Aruba den e Conseho. E ta reemplasa mr Mito Croes (dfm) cu tabatin e funcion te 1 di juni 2016, y despues a fayece. E tempo ey sra Schwengle tabataabogado di profesion na Aruba cu bufete HBN Law y ta un 'managing partner'. 

CURRICULUM VITAE DI MILDRED SCHWENGLE

Mildred (Milly) Schwengle a studia ley na e anterior Katholieke Universiteit Nijmegen. Entre añanan 1990 y 1994 e tabata fungi como “plaatsvervangende officier van justitie” y despues como griffier na Corte di Prome Instancia. Na 1994 el a bira abogado y el a traha como abogado na Aruba y Corsou y tabata partner na e bufete HBN law, te cu su nombracion como miembro representante di Aruba den RvS.