Aruba y Hulanda ta firma acuerdo riba clima durante conferencia

ORANJESTAD – Aruba y Hulanda lo firma un acuerdo di cooperacion pa cu e clima, durante e conferencia Caribbean Climate & Energy Conference (CCEC), organisa pa ambos pais. Pa e firmament aki, e minister Hulandes di Clima y Energia Rob Jetten lo ta na Aruba.  Manera ta conoci mundialmente, calentamento global ta causa cu e nivel di awa (lama) ta eleva. Segun e pronosticonan pa e añanan nos dilanti, si no haci nada relaciona cu e situacion aki, e ora, por ehempel, e islanan den Caribe sigur lo sufri consecuencia y kisas desastroso.  

ARUBA Y ENERGIA RENOBABEL

Energia renobabel manera windmolen, solar pannel ta percura, entre otro pa energia limpi pa mas lihe por  cumpli cu e tratado di Paris 2050. Actualmente, Aruba ta cumpliendo cu 17% di energia renobabel y cu e vision pa Aruba alcansa 35% durante aña 2024 y pa 2030 Aruba lo mester yega 50%.  Logrando esaki Aruba mescos e 194 paisnan na mundo cu a firma e tratado di Paris 2050 ta contribui pa mantene calentamento global maximo na 1.5 grado celsuis y asina limita e elevacion di awa (lama) cual por ta desastroso primordialmente pa e islanan den Caribe.

Riba e invitacion di Aruba y Hulanda, representantenan di diferente pais, organisacion y expertonan mundial riba e tema aki ta na Aruba pa e conferencia importante aki. E Conferencia ta inicia di diaranson 10 y lo termina diabierna 12 di mei proximo.  Aruba riba e dia final lo enfoca riba su plan y transicion pa energia limpi y renobabel. Aruba lo “showcase”, entre otro, proyectonan di LNG, Windpark, Solar y Hydrogen Valley.  Mundo henter su atencion ta dirigi e siman aki riba e prome Caribbean Climate & Energy Conference (CCEC).