“Sagar 1” y “Simply Shoes” den Caya Grandi destrui pa candela

ORANJESTAD – A tuma bomberonan 2 ora prome cu nan por a domina un candela grandi awe mainta cu a laga dos negoshi den Caya Grandi destrui. Tabata awe mainta algo pasa di 9'or, ci polis y brandweer a bay den Caya Betico Croes, unda dos negoshi lo tabata na candela. Na yegada enberdad nan ta confirma cu ta trata di e negoshinan Sagar 1 y Simply Shoes ta na candela, y cu basta huma tabata saliendo di e negoshinan aki. Mesora brandweer a pidi refuerso di mas truck y polis tambe a pidi pa nan coleganan bin reforsanan pa cera e camindanan den cercania. Brandweer a cuminsa combati e candela, y na dado momento e candela a cuminsa sali for di dak di e negoshi cu peliger cu rapidamente e lo por expande. Brandweer a pone Elmar mesora na altura pa bin kita e suministro di coriente for di e negoshinan aki. Tambe a pidi pa presencia di ambulance por si acaso un di nan personal por bira malo na e sitio. E doñonan di e negoshinan a wordo poni na altura y na nan yegada nan a keda den un shock mirando con e candela feros tabata destruyendo nan negoshi. Slachtoffer hulp a wordo pidi pa atende cu nan. Despues di un rato e hoogwerker di brandweer tambe a bay na e sitio y for di halto tabata combatiendo e candela. Despues di mas cu dos ora cu personal di brandweer tabata combatiendo e candela ainda huma tabata keda sali for di e negoshinan, pero e peligro di expande tabata bou control. No por bisa si otro negoshinan cerca por a sufri di daño di awa of huma.