Director Internacional di Royal Schiphol Group a bishita AAA

ORANJESTAD – E siman aki, Director Internacional di Royal Schiphol Group, Sr. Kjell Kloosterziel a haci un bishita di cortesía na varios gruponan di interes. Durante su bishita, hunto cu CEO di Aruba Airport Authority N.V. (AAA), Sr. Joost Meijs, Sr. Kloosterziel a reuni cu Gobernador di Aruba, Sr. Alfonso Boekhoudt, Prome Minister di Aruba, Sra. Evelyn Wever-Croes, Minister di Turismo y Salud, Sr. Dangui Oduber, e Hunta di Supervision di AAA y e Team di liderasgo di AAA. Tambe e la bishita e sitio di construccion di Gateway 2030, Fase 1A na aeropuerto.

Durante e combersacionnan tur a expresa y a reconfirma nan satisfacción cu e cooperacion fructifero durante e ultimo dos década entre Gobierno di Aruba, Royal Schiphol Group y Aruba Airport, cu a conduci na un compania y operacionnan saludabel den tur aspecto. Aruba Airport ta wordo considera dor di esnan den e cooperacion como un infrastructura crucial pa Aruba y e punto di entrada pa Aruba pa miyones di turista y su residentenan.