Aruba Hi-Winds ta presenta su di 35 edicion na The Fisherman’s Huts

PALM BEACH - E anticipacion ta grandi pa e di 35 edicion di Aruba Hi-Winds cu lo tuma lugar desde 17 - 22 di mei 2023 na Fisherman’s Huts. Den Caribe, Aruba Hi-Winds orguyosamente ta e evento cu tin mas hopi tempo ta wordo organisa, cu un comision organisatorio solido cu ta boga pa sostene y sigi engrandece e diferente deportenan (acuatico). Durante e decadanan, Aruba Hi-Winds a crece di un competencia di windsurfing bastante chikito, pa un evento completo yena cu entusiasmo y adrenalina riba awa y tera. E organisacion ta sumamente agradecido na e sosten di nan partners Successfully Caribbean, Amstel Bright, Aruba Tourism Authority, Vader Piet Wind Park y CXPay.

REGISTRACION

Atletanan por inscribi online pa participa na Aruba Hi-Winds, den un forma facil y lihe riba e website arubahiwinds.com. E registracion oficial lo tuma lugar riba diaranson, 17 di mei 2023 entre 2 – 5 PM, sigi pa un apertura festivo cu entretenimento na Fisherman’s Huts.

CATEGORIA & PREMIO

Atletanan hoben y madura ta bonbini pa participa na e competencianan pa adulto y hoben, cu consideracion special pa mucha y “beginners”. Ademas di e competencianan popular di windsurfing y kiteboarding, Aruba Hi-Winds ta presenta un categoria nobo pa e edicion aki, cual ta Kite X (Kite Cross). E tan gusta caredanan di Sunfish sailing y competencia di mountain bike tambe ta forma parti di e di 35 edicion di Aruba Hi-Winds.

LIVE STREAM

Tur careda por wordo sigi na canto di lama y tambe riba e pantayanan cu lo ta disponibel na Fisherman’s Huts pa no perde ningun detaye di loke ta pasando riba awa, incluyendo e Big Air eliminations den e categoria di kitesurfing. Publico for di tur skina di mundo lo por sintonisa y comparti e live stream di Aruba Hi-Winds, atravez di arubahiwinds.com.

ACTIVIDADNAN

Un y tur ta invita pa disfruta di e caredanan y actividadnan, mientras cu ta apoya e atletanan local y internacional na Fisherman’s Huts. Tur dia lo tin un happy hour di 5 PM – 7 PM, un food court, musica y entretenimento di diferente DJ y banda local. Mas informacion di e di 35 edicion di Aruba Hi-Winds y e schedule di actividad completo ta disponibel riba e website: arubahiwinds.com.