Parkeer den Den Haag lo costa 50 euro pa 10 minuut of un dia

DEN HAAG – Pa esnan cu por tin keho riba parkeer pa 2 florin pa ora of simplemente cobransa contra parkeer, mester sa cu na Den Haag Hulanda, a cuminsa cobra 50 euro pa parkeer, sea ta pa 10 minuut of henter dia. Den Haag a dicidi di introduci esaki, pa asina motiva hende pa parkeer den garashi di parkeer envez di usa e lugarnan di parkeer riba caya normal. E suma menciona ta e tarifa pa dia. Pero no ta distingui cuanto ora bo ta parkeer. Si bo parkeer henter dia of 10 minuut so, e suma ta keda mescos. E plan ta pa purba esaki pa 1 aña y wak si esaki enberdad ta un motivacion pa parkeer den garashi di parkeer special. E ciudad ta sufri di scarsedad di lugar pa parkeer y casi nunca no por haya lugar pa parkeer. Esnan di Den Haag por haya permiso special si pa parkeer pa menos placa.