Hospital Horacio Oduber contento cu a stop cu recorte den cuido medico

ORANJESTAD – Manera cu Noticiacla a raporta algun tempo pasa caba, gobierno di Aruba unilateralmente a dicidi pa para e recorte di 5.5% den cuido medico. E recorte di 5,5% riba cuido a ser introduci na Aruba como un di e rekisitonan di e fiansa cu Hulanda a duna nos isla como sosten economico a consecuencia di e pandemia di covid. Pues hopi hende riba nos isla mester a entrega parti di nan salario. Pa loke ta personal den cuido e recorte den salario tabata di 5,5%. Hunta di Directiva di HOH ta gradici tur mimebro di personal pa e cooperacion duna den esaki pa por a brinda ayudo na Aruba y tambe Hospital mes. 

REALIDAD AMARGO

E realidad amargo cu hustamente durante un crisis den cuido, e recorte tabata den cuido medico mes cual tabata pa Hunta di Directiva e motibo pa desde 1 di januari 2021 paga un bes mas 100% e salarionan na HOH. Esaki no obstante e desviacion pa cu e landspakket y e recorte di 5,5% riba e budget di cuido (lumpsum) di Hospital. 

ORGUYOSO

“Mi ta hopi orguyoso cu no obstante e recorte di 5,5% riba nos lumpsum asina mes diariamente hunto nos a sigui brinda bon cuido na nos comunidad y turistanan. Mi ta realisa cu esaki no semper tabata mesun facil y sigur mirando cu e recorte riba salario pa hopi tabata un reto. Pues mi ta hopi contento cu e “weeffout” aki, despues cu nos mes internamente a resolve e problema aki pa nos empleadonan, awo a coregi esaki pa Hospital mes tambe y tur otro instancia medico. E la costa siguramente hopi energia di nos tur y a la bes un constante “lobbywerk”, director di hospital Jacco Vroegop ta bisa yena di gratitud. 

COMPENSA COLEGANAN 

Awo cu HOH desde 1 di mei 2023 financieramente lo ricibi 100% di e budget di cuido di UO AZV, “lo nos hunto cu ABV bay investiga con nos por compensa nos coleganan pa loke ta e inflacion riba nos isla, pero tambe con nos por bay inverti miho ainda den educacion, aparato nobo y tambe inverti den mehora esfera na diferente localidad special pa colega y pashent,” segun Hunta di Directiva.