Hoben ta muri un morto cruel di trafico na Savaneta

SAVANETA  - Un hoben di 19 aña a perde su bida den accidente diadomingo mainta. E la cay di e brommer na cu e tabata core, na altura di Wintergarden, dal su cabes contra un auto, pa despues  un otro auto pasa riba dje y a sigi core. Polis y ambulance a bay na e sitio y a ripara cu e no ta duna senjal.di bida. Mesora a pidi pa.presencia di docter y autoridadnan competente. Pa 10:55am docter Giel a constata morto di Sheaffer Mark Vlaun naci 20 Maart 1996. 

DI 5 MORTO

Cu esaki nos ta conta caba e di 5 caso di morto den trafico riba nos isla, di cual 3 tabata riba un motorcycle. A registra e prome accidente fatal e aña aki riba diadomingo 1 di februari 2014 na altura di Kazerne di Brandweer na Sabana Berde. Aki un motociclista hoben di apenas 17 aña di edad a fayece. E di dos accidente fatal a tuma luga diabierna 13 di maart na Spaans Lagoen, ora un auto a alcansa un hobencita di apenas 12 aña di edad cu tabata hungando riba caminda. Pa su mañan 14 di maart el a fayece den oranan di merdia na Hospital. A raporta e di tres caso diasabra 28 di maart riba e caminda di Shete bayendo Conchi. Un jeep a bolter y un turista naci na Filipina a fayece. E di cuater caso a keda registra dialuna 6 di april, den cual un motociclista a perde su bida na altura di Any Time Restaurant na Paradera y awor esun di awe diadomingo mainta riba caminda grandi di Savaneta.