'Contra-oferta' sorpresa di Aruba a wanta RMR su decision

DEN HAAG – Un ‘contra-oferta sorpresa’ di Aruba, a pone cu awe conseho di minister di Reino di Hulanda no a tuma un decision pa impone e Algemene Maatregel van Rijks Bestuur pa Aruba. Informacion confirma for di Hulanda cu NoticiaCla.com a haya, ta bisa cu Hulanda a ricibi e oferta aki sorpresivamente entre diaranson y diahuebs, y basa riba esey, a dicidi di ‘duna Eman y Bermudez un chens’. E AMvRB tabata riba agenda awe y e intencion tabata pa presenta esaki pa Aruba, cu e meta pa sigura cu College Financieel Toezicht por a haya su entrada trankil na Aruba y haci su trabou sin problema. 

AMvRB

Sinembargo tin confirmacion tambe cu e AMvRB ta ‘aangehouden’, esta wanta ainda pasobra ‘e situacion no ta resolvi ainda’. Tur cos ta depende awor di e desaroyo di e combersacionnan entre minister hulandes Ronald Plasterk y su consehero principal Richard van Zwol otro siman na Aruba. Plasterk ta compañando Rey Willem Alexander y Reina Maxima durante nan bishita cortico pa Aruba y Bonaire otro siman.

NEGOSACION INTENSO

A tuma nota cu tabatin negoshacionnan intenso andando den siman. Diahuebs anochi a bira conoci cu lo tin un posibilidad cu lo a duna Aruba ‘un chens’ atrobe, y lo presenta esaki otro siman personalmente. E detayes di esey no ta conoci ainda, kico e ‘oferta nobo’ aki lo tabata ta. Tambe informacion cu nos tin, ta bisa cu no kier a lanta ‘mucho stof’ awor mirando cu Rey Willem Alexander tabata na caminda pa Aruba otro siman. Y un desicion manera cu tabata e intencion, lo a daña e atmosfera di e bishita aki. Como tal tur e puntonan aki a hunga un rol cu awe no a pasa pa e decision si Aruba ta haya un AMvRB.

MAATREGEL RIBA AGENDA

Tabata e siman aki cu documentonan importante a cay den nos man, referente e reunion di RMR di awe. Segun e aanbiedings brief presenta, esaki tabata poni pa Aruba traha cu, y acepta College Financieel Toezicht (CFT) na bon of na malo. E pasenshi di Hulanda a caba y esaki tabata e mensahe cu gobierno di Aruba lo mester a haya awe di conseho di minister di reino. Na e ocacion ey lo a a discuti y presenta e Algemene Maatregel van Rijks Bestuur (AMvRB) na gobierno di Aruba.  NoticiaCla.com por a confirma cu e protocol ey tabata riba agenda pa wordo trata. E mensahe di e protocol  tabata cu sea Aruba ta acepta CFT den forma voluntario pa , of ta haye obliga pa tume den forma ‘obligatorio’, cu tur su consecuencianan. Y unabes cu Aruba ricibi e medida aki, e lo tabatin dos siman tempo pa reacciona ariba. 

REACCION

Loke tambe ta un hecho ta cu gobierno di Aruba, -via su minister plenipotenciario na Hulanda-, a haya e concepto di e protocol aki caba dos siman y mei pasa (1 april) . Den e asina yama ‘aanbiedingsblad’ (mira e blad aki), conseho di minister di reino ta wordo pidi pa presenta e protocol aki na gobierno di Aruba, cu e peticion pa Aruba reacciona mas tarda, 8 di mei proximo. E forma con Aruba lo reacciona, ta determina cua protocol Hulanda lo ehecuta e ora.

CONCEPTONAN

E prome concepto di e protocol ta basa riba articulo 38 di statuut, cu ta indica cu Aruba ta coopera a base ‘voluntario’ pa yuda y acepta CFT, y asina CFT ta haya su legalidad completo valido pa funciona na Aruba. Si Aruba no coopera y anuncia esaki ( y protesta pa dia 8 di mei), Hulanda lo impone e concepto di protocol cu ta basa riba articulo 51 di e protocol, cu ta esun cu a uza pa tanto St Maarten y Corsou.

NO A CUMPLI

E motibo (segun e aanbiedingsbrief presenta pa Plasterk) pa cual Hulanda ta actuando asina, ta pasobra Aruba no a cumpli cu palabracionnan haci durante e reunion di conseho di minister di reino dia 12 di december 2014, unda cu lo a bay di acuerdo cu ta duna CFT un forma mas structural di funcionamento cu pais Aruba. Sinembargo ta mira cu Aruba no tin un ‘draagvlak’ pa por sigui ehecuta e acuerdo aki, no obstante e palabracionnan haci di dia 12 di december ultimo. Un di e puntonan ta tambe cu ainda Aruba no a presenta un miembro cu mester representa Aruba den CFT. “E falta di un areglo structural di CFT na Aruba, ta haci cu e trabounan di CFT, su independencia y e publicidad di esaki ta den wega aki”, segun e pensamento di gobierno di Hulanda.

REACCION GOBIERNO

Den un reaccion cortico pero sigur diaranson, minister di finanza di Aruba, Angel Bermudez a bisa "Na e momentonan aki, ami no ta na altura di e desaroyo aki!". Mas e no a bisa e momento ey.