Gobierno a dicidi di kita recorte di 5.5% di dunadornan di cuido

ORANJESTAD – Gobierno di Aruba a dicid pa kita e recorte di 5.5% di dunadornan di cuido. Asina minister di salud Dangui Oduber a confirma awe mainta. “Nos ta gradici nan pa nan comprension duna durante temponan hopi dificil y awor ta momento pa duna bek!” e mandatario a sigui bisa. Esaki tabata e ultimo parti di e recorte for di tempo cu pandemia a dal Aruba na 2020. Como parti di e medidanan cu mester a tuma, a dicidi e tempo ey, pa haci e recorte di 5.5% di dunadornan di cuido.  

A INFORMA CAFT

“Nos a informa CAFT di e decision aki y nos a splicanan cu no tin base legal y tampoco hustifiacion mas pa mantene e recorte aki” e mandatario a confirma pa e portal aki awe mainta. “Cuido a duna tur cooperacion necesario, a traha bao hopi presion durante e periodo mas dificil den nos historia pa cuido medico y tawata tin tur comprension pa e situacion. E no tawata nada facil y pesey un palabra di gratitud na henter e sector pa tur e trabounan cu nan ta haci brindando un cuido di calidad na nos aseguradonan”.

CON A PARA CU E RECORTE DI AZV?

Pa loke ta e efecto di e recorte di AZV di 60 miyon, e mandatario a splica cu gobierno ta preparando un “meerjaren” raming cu lo mester percura pa gobierno por maneha su gastonan. “ Nos a determina caba un suma maximo cu por gasta annualmente. Esaki hunto cu reformanan lo mester garantiza cu e gastonan ta keda manehabel” e mandatario a finalisa bisando.

CARTA NA JANUARI 2023

Por corda cu e portal aki a publica na januari di e aña aki cu no ta solamente ambtenaarnan di gobierno a pidi pa kita e recorte salarial, pero tambe esnan den cuido medico a ‘pidi’ minister di Salud Dangui Oduber pa esaki tambe. Den un carta cu tabata den poder di noticiacla, dirigi na e minister en cuestion, esnan den cuido medico a pidi pa e minister revoca e decision di recorte den AZV y tambe pa kita e recorte di 12.6% pa trahadonan di SABA. Contrario sinembargo na e sindicatonan, e trahadonan di cuido medico inicialmente no a pone un ultimatum. “Ta dun’e tempo pa haci e cos corecto” un di e firmantenan a sigura noticiacla.com e tempo ey. Despues a bisa cu ta duna e mandatario 2 siman di tempo cu ta suficiente. Mientrastanto fin di januari 2023 RMR (Rijksminister Raad) a aproba pa gobierno di Aruba kita e recorte pa ambtenaar. Pero no ta haci mencion di e recorte pa cuio medico. 

E CARTA

E carta ta cuminsa recorda cu tabata na juni di 2020 cu a introduci e recorte riba AZV, di 5.5% pa asina pa aña tin un recorte di 60 miyon den e seguro medico. Mescos a haci pa ambtenaarnan pero di 12.6%. “Mientrastanto pa medio di un ley di 29 di December 2022, prome minister (Wever:red) a anuncia cu e recorte ta wordo revoca. Nos ta pidi bo pa anuncia un mesun decision pa loke ta e instruccion cu a wordo impone riba AZV y cu pa 1 di januari 2023 nan tambe por revoca esaki. Y tambe e recorte pa trahadonan di 12.6% na SABA” e carta ta sigui bisa. 

SOLIDARIO

E carta tabata sigui bisa cu tabata solidario pa 2 aña y mei, cu tabatin efecto structural y maneho di cuido medico. A tuma nota cu cos a drecha remarcablemente cu economia di Aruba, y te hasta cu AZV no tin deficit mas y cu a crea te hasta un surplus. Como tal ta husto pa mescos cu a haci cu ambtenaar, pa elimina e recorte menciona pa cuido medico. “Nos ta spera un anuncio  (similar) cu ta para e instruccion y lo kier tin un combersacion cu bo persona pa wak kico mester mas pa e aña aki riba e tereno di cuido” e carta a finalisa bisando.