Griffier retira lo sigui haya salario te ora trata caso di retiro den corte

ORANJESTAD – Huez a aproba pa e ex griffier di Staten ,Jacqueline Bastien, sigui ricibi pago como griffier te ora cu su caso di retiro bin dilanti. Esaki no ta nifica cu Bastien a gana su caso di retiro, pasobra esaki tin cu wordo trata ainda. Presidente di parlamento Marisol Lopez Tromp a confirma awe merdia na NoticiaCla.com cu esaki ta nifica cu Bastien ta keda riba payroll di gobierno te ora cu e caso di retiro mes bin dilanti.No ta conoci ki dia e caso ta wordo trata ainda.

RETIRO OFICIAL

Despues cu parlamento a retira Bastien for di trabou aña pasa 3 di november ( a retir'e a base di a haci mal uso di fondonan di Staten y no tabata adecuado pa e trabou), e la ricibi su carta di retiro oficial na maart di e aña aki. “Consecuentemente e la wordo kita for di payroll di gobierno” Lopez a sigui bisa. Algo cu ta normal segun Lopez Tromp, ora bo wordo retira. A base di esaki ,Bastien a protesta. “Y su protesta tabata cu e kier a sigui cobra, despues di a wordo kita”. Ora cu como ambtenaar bo lanta un caso como bezwaar, normalmente huez por bisa cu bo por keda cobra te ora cu bo cas bin dilanti. “Si e no a protesta, nada lo a pasa”, Lopez ta sigui bisa. 

WARDA E CASO

Tin posibilidad cu por dura un of mas aña pa e caso bin dilanti (e persona tin e schaal di mas halto cu ta 16 cu ta 135.000 pa aña), y durante e periodo ey, e por sigui cobra gobierno e salario cu e tabata cobra prome cu su retiro. “No ta asina cu e la gana un caso cu tin di haber cu su retiro, of loke e la haci den pasado” Lopez ta subraya. “E la exigi despues cu e la wordo retira, cu e por cobra na cas, despues cu e tabata un aña na cas”.

LMA ANTICUA

Huez a aproba e continuidad di pago di salario diaranson, a base di un LMA basta anticua. E LMA ta dicta cu momento cu un ambtenaar bin cu un bezwaar y bisa cu e no ta di acuerdo cu e no ta ricibi cen, prome cu su caso di retiro bin voor, e por cobra te ora cu e caso bin dilanti. “Loke e la exigi ta placa, y loke e ta interesa aden ta pa sigui cobra sen di parlamento” Lopez a sigui bisa finalmente.