Barco “Mi Dushi’ ta sigui perdi desde fin di siman

ORANJESTAD – E barco nobo ‘Mi Dushi’ tin dos dia caba perdi riba laman, y ta posibel victima di sabotahe. E doñonan ta buscando forma pa localisa e barco y hunto cu gobierno y otro instancia ta haciendo e esfuerso pa localisa esaki. Na e altura nan aki e barco ya por a pasa costanan di Venezuela y Colombia y por ta yegando Panama. Tabata entre diasabra y diadomingo marduga cu un persona lo por a corta e cabuya (mooring) y cu e biento fuerte, laga esaki drief bay. Ya pa diadomingo merdia, e bapor tabata pafo di awa teritorial di Aruba. “Nos a haci tur intento di accion hunto cu gobierno local y ayudo di hopi otro persona, pa purba localisa e barco. Pero te awor, esaki tabata envano”. Doñonan tin un potret saca dia 18 di juli, esta diabierna ultimo, ora cu nan a pone bek den laman, un luna despues di trabounan riba dje, na e ‘astillero Varadero’. E barco ta 50 pia largo y por carga 70 persona. Ta pidi cualkier persona cu por sa algo, pa informa polis pa asina yuda localisa e barco popular aki, Mi Dushi.