Curpa sin bida di persona na Baby Beach posibel illegal

SAN NICOLAS - Curpa di un persona hoben haya na Baby Beach, probablemente ta di un persona cu a purba drenta Aruba illegal, pero no a logra. Awe marduga un grupo di persona indocumenta a subi tera na altura di Baby Beach. Den e proceso aki, un di e personanan lo a hoga, pa cual a haya su curpa awe mainta ta drief. Un turista cu tabata 'duik' eybanda a haya e curpa ta drief. 

KICO A SOSODE

Segun vocero suplente di polis Liliana Rasmijn a informa NoticiaCla.com, polis a haya e melding 10'or na Centrale Post. E melding tabata cu un turista a bay snorkel, y a topa cu e curpa ta drief. Mesora a avisa polis maritimo cu a bay na e sitio y saca e curpa. Pa 10:55 docter Line a constata morto di e persona. Segun Rasmijn, no por a saca afo ken e persona ta. Unico informacion suministra, ta cu e ta un persona masculino di entre 30 y 40 aña. Mes momento e la confirma cu un grupo di persona mas prome a subi tera na altura di Baby Beach tambe. A sigui pa detencion di e personanan aki. A dicidi e ora cu lo hiba e personanan deteni illegal, pa wak e curpa y wak si nan ta 'reconoce' e persona. E caso a wordo pasa pa recherche cu lo sigui cu e investigacion.