Ryçond Santos Do Nascimento ta declara su mes Parlamentario independiente!

ORANJESTAD – Despues cu e parlamentario Ryçond Santos do Nascimento a confirma dialuna anochi laat na Noticiacla cu e ta retira di partido AVP, e la confirma diamars mainta na e portal aki, cu e la cuminsa e procedura caba pa bira un parlamentario independiente. Cu esaki ta nifica cu e ta retira di partido AVP y ta keda cu su asiento, cu pa ley, e tin derecho ariba. Ademas e la confirma cu e la oficialisa su retiro door di manda esaki por escrito pa e lider di partido, y tambe a papia cu esnan responsabel pa e fundacion di e fractie cu e ta retira di esaki tambe. 

RETIRO

Tabata dialuna anochi, manera cu e portal aki a raporta caba, Santos Do Nascimento a dicidi finalmente cu ta basta, y cu e no ta keda cu e partido berde, despues cu e partido dialuna anochi a dicidi di sostene e candidato Benny Sevinger pa e keda como parlamentario. Esaki despues cu hues a sentencie diabierna ultimo na 1 aña di castigo di prizon y prohibie pa ta activo politicamente pa 5 aña. Mientras cu pa ley, un parlamentario no ta obliga pa retira cu un sentencia, ta considera cu esaki moralmente ta algo etico pa haci. Y pesey e partido a reuni dialuna anochi pa dicidi si ta laga Sevinger sigui keda den Parlamento como miembro di AVP. Pero e decision aki, tabata pues suficiente pa Do Nascimento saca su conclusion y retira per direct di e partido, cu tur su consecuencianan.