Awe nochi partijraad di AVP ta dicidi si Benny Sevinger ta keda parlamentario of no

ORANJESTAD – Awe nochi den seno di partido politico AVP, lo ‘dicidi’ si miembro di partido y actual parlamentario Benny Sevinger ta keda sinta como parlamentario, awor cu e la haya un sentencia diabierna den caso penal di Avestruz. Diabierna ultimo Corte a sentencia Sevinger na 1 aña di prizon di cual 6 luna ta condicional, y 5 aña cu e no por participa den un eleccion y tin un funcion politico. Pa ley, no tin prohibicion pa Sevinger sigui den Parlamento cu un sentencia di prizon, tanten cu e no a eherce tur e posibilidadnan cu ley ta permiti e persona, esta apelacion y casacion. Ta ora cu si e persona perde tambe den casacion, e tin cu bay cera e ora conforme e sentencia.

KICO PARLAMENTO TA BISA

For di Parlamento, noticiacla.com a compronde cu no por prohibi ningun parlamentario. E unico manera cu despues di huramenta, cu e no por eherce su funcion mas como Parlamentario, ta si e fayece, si e mes retira, of si e keda mas di 8 luna pafo di Aruba. Pero legalmente no tin otro base pa retire como Parlamentario, pues hasta si e haya un castigo di prizon. Ta solamente si e la keda condena prome cu e la huramenta como parlamentario, no por huramente. Pues de facto, cu un sentencia aworaki di prizon, Sevinger no ta obliga pa retira como parlamentario. 

AWE NOCHI

A compronde cu awe nochi lo ta mas bien un formalidad pa scucha partijraad, unda cu lo duna e partido e chens pa vocifera su pensamento y despues cu Sevinger presenta tur e cargonan y e sentencia y duna su splicacion integral, ta laga partido dicidi. A compronde cu mirando cu tur loke a wordo bisa publicamente caba (diabierna lider di partido Mike Eman a sostene Sevinger tambe despues di e sentencia:red), lo ta hopi improbable cu partido AVP lo dicidi pa Sevinger no bolbe como parlamentario.