DIMAS: Promotornan a pidi permiso 3 dia prome cu concierto 'Duelo de Genero'

ORANJESTAD - Organisador di e concierto di e fin di siman aki, Duelo de Genero, cu artistanan Yeison Jimenez y Elder Dayan Diaz di Colombia no a tene cuenta cu procedura di permiso pa evento cu artista internacional. Asina e department DIMAS a sigura diadomingo den un comunicado. E ta reacciona riba critica unda cu ta critica cu e.o. DIMAS tabata entre e departamentonan cu tabatin problema di comunicacion cu a pone cu e artistanan Colombiano no por a drenta Aruba diasabra durante dia pa presenta e mesun anochi na Aruba. DIMAS ta sigura cu e fayo no tabaa cerca nan sino cerca e organisadornan. E concierto mientrastanto a keda aplasa pa diadomingo anochi (awe). 

KICO A PASA

For di diasabra den dia tabata surgi rumornan cu e artistanan tabatin problema pa drenta Aruba y consecuentemente no lo por a presenta den e concierto e mesun anochi ey, cu segun promotornan, tabata casi completamente bendi. Durante atardi pa anochi e noticia a bin oficialmente di parti di e promotornan cu a confirma cu debi cu tabatin un fayo di comunicacion entre departamentonan di gobierno, cu no a laga e artistanan (cu a yega Aruba si) drenta e isla, y a manda nan bek riba e mesun avion cu nan a bin cune, rumbo pa Colombia. Esaki a pone basta hende disgusta pasobra a cumpra carchi pero no tabatin concierto. 

CONFERENCIA DI PRENSA

Mientrastanto anochi e organisadornan a tene un conferencia di prensa e anochi mes na Harbour Arena, e lugar di e concierto, pa splica un que otro. Nan ta sigura cu nan tabatin tur documento na ordo, incluyendo permiso y cu nan tabata haciendo tur posibel pa logra tene e concierto e siguient dia. Asina representante di e promotornan, Darren van Ommeren a sigura prensa. 

KICO A PASA SEGUN DIMAS

Segun DIMAS su splicacion sinembargo un dia despues, esta diadomingo, den e caso di e concierto di weekend aki lamentablemente e peticion di permiso pa e artistanan di Colombia conhuntamente cu nan acompañantenan a ser entrega den dos batch respectivamente 2 y 3 dia prome cu e evento y a culpa e organisadornan (promotornan) di e fayo y cu esaki pues no tabata na Dimas. 

FUTURO

Pa evita cualkier inconveniencia den futuro DIMAS a haci un apelacion e ora na tur organisador y promotor responsabel di eventonan cu artistanan of personanan cu lo bin for di exterior pa regla tur procedura di permiso cu anticipacion y no menos cu 10 dia laboral prome cu e evento.

E CONCIERTO

Mientrastanto cosnan a keda regla entre diasabra y diadomingo y e artistanan a bolbe Aruba diadomingo mainta pa asina nan por presenta den e concierto cu a keda aplasa cu un dia.