Minister kier sondea posibilidad di haya gas entre Aruba y Corsou

ORANJESTAD - Minister di Energia Glenbert Croes kier explora gas entre e fronteranan di Aruba y Corsou. Esaki e la haci durante su bishita recien na  compania Spaño Repsol. E mandatario a splica cu Compania Arubano di Petroleo(CAP), cu ta resorta bou di su ministerio, ta sondeando posibilidad di cooperacion cu compania ruman di petroleo na Corsou, “Kompania di Petroli i Gas Kòrsou (KPG)”, pa e idea di e exploracion, pa cual un carta a bay pa Minister President di Corsou Sr. Gilmar 'Pik' Pisas. “E meta ta pa hunto entre e frontera di Aruba y Corsou, investiga e indicadornan di posibilidad pa gas entre e dos paisnan aki. Pa esaki, lo ta desea di por haya un empresa di credibilidad manera Repsol, pa ta interesa den e posibilidad di exploracion di gas” e mandatario a sigui bisa. 

GAS NA ARUBA?

Manera ta conoci,  y a mandatario a recorda esaki tambe, den pasado Repsol a inverti 200 miyon dollar di su propio placa den exploracion di gas na Aruba. Lamentablemente no a haya nada di gas. Awor kier purba expande e area y wak si entre Aruba y Corsou si por tin gas. No ta descarta cu Repsol por ta e compania atrobe pa haci e trabounan aki, y e mandatario a bisa cu a percura pa laga e speransa di posibilidad bibo cerca Repsol pa posibilidadnan di inversion den futuro.