Cillie: Narain ta kere cu e por traha den hospital sin permiso

ORANJESTAD – Director interino di hospital Horacio Oduber, -Ezzard Cillie - , a confirma cu a prohibi entrada na ginecologo Harold Narain. “E (Narain) ta bon na altura cu su toelating a vence 28 di februari 2015, y cu esey ta ensera cu e no por uza facilidadnan di Hospital” Cillie a sigura NoticiaCla.com, reaccionando riba e noticia di AZV. Segun AZV, aunke cu nan a prolonga e contracto di e ginecologo temporalmente, toch hospital no ta permitie e entrada. Y Cillie a duna su splicacion mas extenso awor.

PROHIBICION

“ Dr Narain sinembargo ta di opinion cu e por sigui traha den Hospital sin permiso” Cillie a sigui bisa. Mes momento e director ta bisa cu hospital no por reacciona riba contenido di publicacion nan hasi den media. Esaki “ ya cu tin informacion delicado y sensitivo cu no ta apto pa discusion publico cu ta compromete privacidad di patient” Cillie a finalisa bisando.

AZV

Ayera tabata AZV cu a relata cu ta hospital Horacio Oduber ta nengando entrada na ginecologo Harold Narian, no obstante cu AZV a prolonga su contracto. Segun AZV, hospital ta insisti cu nan tin suficiente motibo pa nan no prolonga e contracto. Como tal nan no ta permitie drenta e edificio medico.

PROLONGACION

Segun AZV, relaciona cu e hecho cu ginecologo Narain a yega su edad di pensioen na februari di e aña aki AZV y Hospital a busca un ginecologo nobo pa yena e vacatura aki. Pa garantisa cuido medico pa su aseguradonan, AZV a prolonga e contract cu dokter Narain, den sincronisacion cu hospital, te cu luna di mei. Asina e ginecologo nobo por tuma over sin cu e aseguradonan ta keda sin cuido di ginecologo.

COOPERACION

Normalmente den casonan asina, Hospital ta coopera cu AZV pa prolonga e contracto entre e specialista y hospital.

Sin embargo, AZV ta bisa cu segun hospital tin suficiente motivo base pa no prolonga e contracto cu Dokter Narain. Esaki ta keda responsabilidad di hospital. AZV ta keda monitoria e situacion y ta purba pa yega na un solucion di e conflicto y pa tin continuidad di cuido.