De Meza ta confirma di no tabatin contacto cu Do Nascimento, pues no a disculpa tampoco

ORANJESTAD – Parlamentario pa partido AVP Mike de Meza diamars a confirma den un entrevisa exclusivo pa 24ora.com cu desde cu tabatin e reunion di Parlamento dos siman pasa cu a trata e ley pa aproba pago di 2 miyon dollar na e Mericano Lee Toffaneli como parti di un ‘settlement’ contra paro di un contracto pa concierto, e no a papia mas cu colega di partido Ryçond Santos Do Nascimento. Pa loke ta e relacion entre e y su colega di partido, de Meza a bisa cu prome cu e situacion entre nan dos a surgi, Do Nascimento tabata papia cu ne tur dia y pidie conseho.  E la sigura cu e no tin problema cu ne (Dos Nascimento:red) , pero for di e dia aki di henter e situacion, e no a papia mas cu ne.

RESPET

E la sigura cu e tin hopi respet pa e partido y pa e lider di partido Mike Eman. Den cuadro di esey e no kier a duna mucho mas informacion y ta laga esaki na lider di partido cu ta atendiendo cu e asunto internamente. Como tal, e no kier bay den publico pa ataca un colega di partido y cu e no ta un persona asina. “Esun cu conocemi sa cu mi no tin problema cu ningun hende”, de Meza a sigui declara. Si nan tin problema cu ne, ta otro cos. Loke ta sali di e entrevista aki, ta cu no tabatin comunicacion entre nan dos, cu conscuentemente ta nifica cu e no a disculpa su mes tampoco na colega di partido Santos do Nascimento.