Do Nascimento: Sea AVP ta brasa corupcion of ta bay den direccion nobo

ORANJESTAD – “Na e momentonan aki, nos ta para na un punto crucial, cu sea nos ta brasa corupcion of nos ta bay den un direccion nobo door di regresa bek na e principionan cu a crea e fundeshi di un politica cu no tabata di hamber pa poder, sino di tin realmente e bienestar di Aruba na pecho”. Esaki tabata un declaracion di e miembro di partido AVP Ryçond Santos do Nascimento riba su pagina di Facebook diaranson. Por a comprond cu e ‘nos’ e ta referi na e partido AVP. Esaki ta e di dos biaha e siman aki cu e ta manda un mensahe personal pa e partido, ya cu ainda e no a tende nada mas di e partido. Esey e mes a confirma recientemente na e portal aki. No ta conoci pa e portal aki, si esaki a cambia y cu pesey e la opta pa pone un otro comentario personal riba su pagina, cu intencion pa hala atencion di e partido cu ‘ainda’ e ta forma parti di dje. Loke. portal aki a compronde diamars ta cu e colega di partido Mike de Meza na cual Santos do Nascimento a exigi un disculpa publico, lo a declara na e portal 24ora.com cu e no ta bay cumpli cu e peticion di su colega di partido. Pa loke ta e declaracion di Do Nascimento su declaracion e la sigi bisa “ Nos ta na turno pa puntra nos mes: nos ta bay hiba un politica di honestidad y integridad of nos ta sigui cu e politica bieu di faborece interesnan di nos "hendenan"?” e ta sigui bisa. 

FUNDACION FORMACION POLITICO DIGNA LACLE

Segun e politico ta sigui bisa, na aña 2017, e a acepta e invitacion pa forma parti di Fundacion Formacion Politico Digna Laclé-Herrera, cual su meta principal tabata y te cu awe ta, pa eleva e nivel di politica na Aruba. “Desde inicio mi a y ta kere fielmente den e meta aki, como cu e ta un meta cu ta haya su fundeshi den e principionan politico di personanan ehemplar manera e propio sra. Digna Laclé-Herrera y sr. Mito Croes. Den cuadro di e fundacion mi a duna hopi curso di formacion politico. Hende di diferente partido a participa y asina mi por a duna un granito di arena na e esfuerso pa eleva politica. P'ami e tabata un orguyo di por a sigui den pasonan di sr. Mito Croes qepd” e la sigui bisa.

“Den contexto politico, tin principio y mantene bo mes na esakinan nifica cu integridad tin un luga halto den bo norma y balornan. Na momento cu bo desvia di bo principio, bo ta bira manera un barco sin timon cu ta nabega riba e lama di oportunismo politico y ganashi personal”

Segun e politico, ta netamente esaki sr. Mito Croes a splica den un conferencia na 1995, cu e raiz di corupcion na Aruba ta politikeria y politica partidista. E ta un sistema na unda e politico kier poder pa por parti fabornan y asina keda den poder. Mito tabata consciente cu organisacionnan politico ta fix nan hendenan y cu ta e sistema mes ta keda corumpi hende. 

“Si nos ta honesto cu nos mes, nos sa cu ta p'esey awe hopi hende ta totalmente desapunta cu politica. Esun cu tin e capacidad of e talento no ta haya e trabao, sino esun cu tin e miho conexionnan” e politico ta finalisa bisando den su mensahe riba su pagina di Facebook. Comentario di e politico no tabata posibel ainda.