Embeyecimento di Columbusstraat y Wilhelminastraat a inicia awe

ORANJESTAD - Trabounan pa embeyecimento di Columbusstraat y Wilheliminastraat a cuminsa awe diamars. E periodo di construccion lo dura 50 dia di trabou.  E trabounan lo cuminsa na altura di Columbusstraat y despues lo sigui den Wilhelminastraat un parti.

PREPARACION

Despues di algun luna di preparacion y coordinacion entre DOW, Contratista, Arubaanse Wegenbouw Maatschappij, cu ta e compania cu a gana e destaho publico Ministerio di Asuntonan Economico cuminsa cu e projecto di embeyecemento di Columbustraat y Wilhelminastraat. "Pa yega na e punto aki no tabata facil pero si tabata necesario pa por cumpli cu e meta stipula den e acuerdo di gobernacion 2021-2025 pa revitalisacion di centro di Oranjestad", segun minister di economia Geoffrey Wever. 

FASE DI EMBEYECIMENTO

E Fase di embeyecimento aki ta e prome di esnan cu lo tin cu bai tuma lugar den e periodo nos dilanti. E intencion ta pa hisa e calidad di e producto cu ta ofrece na localnan y e turistanan cu ta bishita centro di cuidad. E area lo ta uno cu mas iluminacion, mas mata, dobel cantidad di parkeo y cu ta hasi e area mucha mas accesibel y safe pa tur cu ta bishita y muy en especial esnan cu tin un of otro limitacion fisico.