Hooyboer: Lo encarga persona pa atende exclusivamente cu cuido di maestro

ORANJESTAD - Dentro di 1 luna e maestronan lo conta cu un persona den ministerio di enseñansa cu lo ta encarga unicamente cu "Teachers Care", esta e cuido di nos maestronan. Desde comienso como e mandatario encarga cu Enseñansa, Michelle Hooyboer a bisa cu e la señala varios buraco den e maneho pa cu enseñansa. Esaki tabata un di nan, esta e problema di agrecion contra maestro. Mirando tur e ultimo acontecimento e mandatario a dicidi di haci e tramitenan mas lihe pa por ricibi aprobacion pa por agrega un persona mas pa lidera e encargo aki. Den transcurso di algun siman lo anuncia e persona cu lo ta encarga cu e area aki. Banda di esey ya caba a reuni cu diferente instancianan cu lo forma un comision cu lo traha riba un protocol di conducta cu lo wordo introduci pa aña escolar nobo. 

SEGURIDAD FULL TIME

Pa loke ta trata Filomena Basisschool y Filomena College, a regla pa un persona di siguridad ‘full time’ na ambos scol. Banda di esaki a compronde cu SKOA lo institui varios protocol pa nan scolnan pa purba evita loke a pasa cu e cabesante di Filomena Basisschool. No tur biaha por evita situacionnan unda un of mas persona lo kier haci daño na un otro. Pero si, nos por traha na minimalisa e chens cu esaki por pasa door di haci cierto adaptacionnan fisicamente y den procesonan na scol.