CBA: Banconan local por carga peso di ‘koersmargevergoeding’

ORANJESTAD – Banconan comercial por carga e peso di ‘koersmargevergoeding’ cu Banco Central (CBA) ta cobrando nan. Banconan comercial ta gana 30 miyon na compra y benta di divisas, y Banco Central (CBA) tin derecho riba e placa aki. Como tal CBA a dicidi di cobra un porcentahe di e placa aki, pa medio di e ‘koersmargevergoeding’. Esaki ta e splicacion cu CBA a duna parlamentarionan diaranson. E reunion tabata uno pidi pa fraccion di MEP, pa CBA duna cuenta riba e asunto cu recientemente a bira un ‘problema’ ora cu a bira conoci cu banconan lo a cobra clientenan e suma aki bek.

NO COBRA CLIENTE

Segun splicacion di CBA, nan ta haya cu banconan comercial mes por carga e peso aki, mirando e ganashi cu nan tin riba e suma. Y ta pesey segun CBA ya na december aña pasa a purba convence banconan comercial pa no cobra nan clientenan e tax nobo aki. Pero CBA, -segun nan splicacion den parlamento ayera- , a bisa mes momento cu nan no tin e instrumentonan pa forza banconan pa haci tal. Como tal nan a wordo conseha pa no prohibi e banconan di cobra nan cliente. Y e hecho cu banconan comercial mes ta cobrando nan clientenan, pa despues paga CBA, segun CBA ta funciona miho.

REUNI CU MINISTER

E intencion awor ta, segun nan splicacion, cu CBA lo papia awor cu minister di finanza Angel Bermudez, pa wak si e mandatario kier pa CBA papia di nobo cu e banconan y cambia e approach aki. NoticiaCla.com a compronde cu e fraccion cu a pidi e reunion, no a keda nada contento cu e resultado y loke cu nan a tende, y cu a bisa cu nan lo formula un concepto di ley pa prohibi e banconan pa cobra e clientenan. E intencion ta pa nan presenta esaki despues cu nan reuni cu e asociacion di bankero diahuebs awor.