Ryçond do Nacimento no a haya despensa ainda di Mike de Meza

ORANJESTAD – Algo mas cu dos siman a pasa y ainda parlamentarionan Ryçond do Nacimento y Gerlien Croes no a haya nan despensa publico di colega di partido AVP Mike de Meza. “No. Nos no a haya esey. Nos no tabatin un gesprek tampoco entre mi persona y Mike de Meza” Do Nacimento a confirma na Noticiacla. Tabata 19 di maart ultimo cu e la exigi pa e colega di partido (de Meza) duna e y su colega Croes un despensa publico despues cu e colega a ‘tira nan bou di bus’ e siman prome durante un reunion di Parlamento pa trata e ley pa paga promotor di concierto Lee Toffaneli un suma di 2 miyon dollar (despues cu e contracto pa organisa varios concierto pa Aruba a keda cancela, pa cual Toffaneli a demanda gobierno despues).   

E SITUACION

Mientrastanto nos ta dos siman mas leu. Segun do Nacimento a splica noticiacla, e la confirma tambe cu e la papia si cu e lider di partido berde Mike Eman, pero no a bay den detayes. Eman mientrastanto den un entrevisa na 24ora.com a bisa cu tin trankilidad bek den partido pero no a soluciona e asunto ainda. E (do Nacimento ) kier un disculpa y ta haya cu e asunto no mester muri. “Nos mester papia di e issues nan. Ta issues nan serio. Ta cosnan cu a sosode den publico, kier men cu pa mi ta importante cu gespreknan aki ta tuma lugar” e parlamentario a sigui bisa. Mas aleu Do Nacimento a bisa, cu manera cu e la bisa den e programa Noticiacla LIVE, e no ta un cuestion cu e ta haya un despensa, pero e ta haya si cu mester papia di e issuesnan. Riba esaki, noticiacla a recorde si, cu e la pidi specificamente pa un despensa, pues cu esey ta e asunto. Aki do Nacimento a bay di acuerdo y a clarifica cu den e articulo cu e la saca e dia ey den cual e ta papia di e despensa, e la bisa cu de Meza debe nan (e cu Gerlien Croes), un despensa publico. “Pero e preocupacion, e issue ta mas profundo. Pesey cosnan mester wordo papia. No keda bay den doofpot y hende ta lubida y nos no ta papia di issue cu ta importante”. E parlamentario a clarifica tambe cu e no ta mara un consecuencia na e hecho cu si e ta pidi despensa si of no. “Pero e ta duidelijk si cu si bo no ta duna, cara, e pregunta ta, unda bo ta para”, do Nacimento a sigui bisa. 

KICO DE MEZA A BISA

Segun e parlamentario, de Meza a haci varios declaracion den Parlamento, cu no tabata corecto. “Mike de Meza a sali bisa cu e casatieadvies tabata negatief, y esey duidelijk tabata un mentira. E la bisa cu e no a exonera Eddie Briezen, y e vaststellingovereenkomst ta demonstra cu esey si tabata e caso. Esey ta e bottom line” do Nacimento a sigui bisa. 

RELACION CU AVP

Do Nacimento a bisa cu e ta miembro di AVP, e ta keda miembro di AVP. “Pero como partido, nos mester papia e berdad. Bo no por sali y bisa cosnan cu no ta cuadra cu berdad” e parlamentario a finalisa bisando.