Ruiz: Juffrouw Suki Croes cu dos caso legal contra minister

ORANJESTAD – Cu e intencion entre otro di para e investigacion riba juffrouw Suhail “Suki” Croes (scol Basico Kudawecha), bufete di abogado Wever y Croes a entama dos caso contra minister di enseñansa Michelle Hooyboer. Abogado Anthony Ruiz a confirma esaki awe mainta na NoticiaCla.com. Uno ta un ‘bodemprocedure’ y e otro ta un caso sumario cu e bufete a entama diamars (ayera) contra e mandatario. Mas e abogado no kier a bisa riba e asunto.

DOS CASO

E abogado a clarifica tambe cu mientras cu e la confirma ambos caso, e no ta e abogado den e caso aki. E no kier a specifica tampoco cua caso ta pa cua meta tampoco, sino solamente bisa cu ambos ta na nomber di e juffrouw. Y un di nan ta pa para e investigacion cu ta na andando. Mas investigacion a bin saca afor cu e bodemprocedure ta pa trata henter e procedura, mientras cu e caso sumario (entama awe mainta) ta pa e minister 'revoca' e carta di suspension. 

REACCION MINISTER

NoticiaCla.com a tuma contacto cu e mandatario en cuestion y e la reacciona, bisando cu ‘e comision ta ocupa cu nan investigacion y ta continua nan trabou manera planea”.