Facultad di Universidad di Hospitalidad y Turismo a reconoce studiantenan riba Deans List

ORANJESTAD - Ariba diabierna ultimo, Universidad di Aruba Facultad di Hospitalidad y Turismo (FHTMS) a organisa un tremendo “Dean’s List Breakfast”. Un evento bi-anual pa reconoce studiantenan cu a destaca academicamente den cada semester di nan estudio. E programa ta consisti di seis semester cual ta representa un periode di tres aña, y studiantenan ta sigui seis curso den cada semester. Pa logra forma parti di e Dean’s List un studiante mester tin un GPA di minimo 3.25 den e prome aña y un GPA di 3.5 den e di dos y tres aña. 

Segun decano Sue-Ann Lee: “Forma parti di e Dean’s List ta exigi hopi dedicacion y determinacion pa destaca. Mester demostra abilidadnan cu academiconan y professionalnan den communidad en general ta balora. E standard academico aki ta un refleho di cada studiante cu a traha pa ricibi e honor, y tambe e trabou di e staff completo. Nos ta sumamente orguyoso y ta felicita e grupo di studiantenan ehemplar aki formando parti di e FHTMS Dean’s List.” 

Dean’s List Fall 2022 ta consisti di:

Freshmen: Genesis Camacho, Laurenne Croes, Shakaylee James y Thaïtia Schenker

Juniors: Riteshka Chandiramani, Xyanthe Lacle, Camille Lievens, Serelaine Ramos, Michelle Sabajo, Darick Schwengle y Ana Sofia Bermudez

Nos studiantenan ta remarca cu nan ta motiva pa traha duro y asina forma parti di e Dean’s List y ta realisa con importante y prestigioso ta pa ricibi un reconocimiento asina. Demostrando cu “hard work pays off”.  FHTMS ta reconoce e contribucion unico y strategico di e industria di turismo pa e desaroyo di Aruba y Caribe. E studiantenan ta wordo prepara ariba terenonan pa un carera profecional den diferente ramo. Pa mas informacion tocante e programa por bishita www.ua.aw of www.facebook.com/UA.FHTMS