Castigo di prizon y trabou comunitario exigi pa yiu di Promer Minister, su swa y rumannan Williams

ORANJESTAD – Fiscal a exigi un castigo combina di prizon y trabou comunitario pa e yiu di Promer Minister Wever Croes K. Wever (27) y e swa, Torres (22) y e rumannan N (33). y C. Williams(34), yiu di politico Michael Williams. Manera Noticiacla.com a raporta caba, awemainta a cuminsa trata e caso penal contra e sospechosonan aki pa aggression y violencia publico den e restaurant Azia.  

FISCAL

E Fiscal durante su rekisitorio a bisa cu e ta haya legalmente proba cu dia 14 November 2021 den oranan di anochi, tabatin e violencia publico den e restaurant Asia, caminda e chef cook a resulta herida y diferente glasnan den e restaurant a kibra. Ademas e fiscal a bisa huez cu e caso aki a causa un impacto den comunidad y a haya hopi atencion den media, y cual incident tambe a causa un impacto negativo riba tur e turistanan presente den e restaurant. E fiscal a sigui bisa cu Azia Restaurant a sufri daño grandi pero cu e gerencia no kier haci denuncia. Tambe cu polis ta raporta esaki como violencia publico y despues cu recherche a tuma over e investigacion. Tabatin detencion tambe na december 2021 y Januari 2022 y cu 25 Februari 2022 procesverbaal a keda cla.

CASO PENAL ENVEZ DI TOMZITTING

Fiscal a splica cu debi cu e sospechosonan no kier a admiti loke nan a haci, no por a bin cu un Tomzitting. E ora a avisa tur sospechoso na October 2022 cu lo cuminsa un caso penal. E sospechoso K. Wever a opone contra e citacion, cu a pone cu no por a sigui cu e tratamento di e caso na November 2022 manera tabatin planea. Un otro motibo cu no por a sigui cu e tratamento na November 2022, ta cu e sospechoso Torres   a bay biba na Hulanda y no por a presenta. Mientrastanto, dia 23 Maart 2023 a pospone e caso pasobra N. Williams tabata ‘pega’ na Merca y no tabata tey consecuentemente.

INCIDENTE DEN CLUB NOCTURNO

Fiscal a bisa cu promer cu e incidente na Azia, tabatin un incidente na e club nocturno Gusto caminda tabatin intercambio di palabra entre sospechosonan Wever y N. Williams den e baño. Ora cu  Wever a dicidi di bay cu su grupo for di Gusto, C. Williams lo a dal  Wever. cu un boter den lomba. Fiscal a bisa cu e homber Williams a wordo  persigui den Tomzitting y a haya 40 ora di trabao pa comunidad.

INCIDENTE NA AZIA RESTAURANT

E parti pa cual e caso aki ta envolci, ta cuminsa ora cu sospechoso Wever a bay Azia cu e grupo pa celebra cumpleaños di su pareha. Despues di un rato rumanan Williams  a bay Azia tambe. Nan a declara cu nan a bay pa solamente pa come algo y no a bay busca problema. Fiscal a bisa cu riba imagennan di camera di seguridad di Azia por mira tur loke a sosode. E supervisor a bisa cu un di nan a bisa cu nan a bin serca un amigo. El a pensa cu nan lo ta hunto cu e grupo di Wever den VIP, manera cu Noticiacla a raporta den un articulo anterior. A resulta cu N.Williams a bin pa dal Wever,  cu un mokete y a sigui tiramento di boter. N. Williams lo a tira boter riba  Wever. y  Wever a contestando tirando e cu un stoel. Despues N.Williams na salida a tira un glas y kibra un lampi den Azia. Fiscal a sigui bisa cu por a mira tambe cu C. Williams a tira mokete y a tira un glas den direccion di e VIP section, aunke no sa contra ken. El a sigui bisa cu e homber Torres., ora cu N.Williams. a dal Wever., a dal N. Williams. cu mokete. Despues el a pasa man pa un boter y a tira e boter cu a dal e sushi Chef Hernandez na su braza. E sushi Chef e momento ey tabata purba gara N.Williams. El chef a consecuencia di e incidente a sufri 4 corta serio na su man drechi y en total mester a haci 22 cosi na hospital. Un di e cortanan a afecta un ader cu tabata spuit sanger y cu nan mester a pone un verband cu presion pa controla e sangramento pisa.

CASTIGO COMBINA EXIGI PA TUR SOSPECHOSO  

Fiscal ta considera esaki un violencia publico den un restaurant cu hopi hende y turista. El a mustra cu hopi hende a sali core di panico. E ta haya cu e grupo aki a stroba orden publico y pesey a pidi asistencia di polis. Fiscal a bisa tambe cu e trahadornan a dura 2 ora pa haci full e restaurant limpi di tur glasnan cu a wordo kibra a consecuencia di e incidente.

Na opinion di Fiscal, den e violencia publico aki no por papia cu e sospechosonan a actua den defensa propio manera cu abogadonan ta pretende. E ta haya cu tanto N.Williams como su ruman C. Williams a bay ataca Wever y cu  N.Wever a bay dal Wever di sorpresa y sin ningun motibo. Fiscal a bisa cu e accion di Wever, door di tira un stoel den direccion di N.Williams. no ta wordo considera como defensa propio. El a mustra cu di biaha despues cu K Wever. a haya mokete, e pelea a start. Amigonan di K.Wever a tira mokete takmbe. Fiscal ta haya cu rumannan Williams   a cuminsa sali for di e restaurant y cu K.Wever a bay nan tras pa tira e stoel y Torres a tira un boter. Na opinion di Fiscal, e momento ey K.Wever. y Torres tabata ataca e rumannan Williams. Fiscal ta haya tambe cu e tiramento di boter di Torres no tabata na su lugar. Pues  Feiscal ta haya tur culpable di violencia publico den restaurant. Ademas e la bisa cu Torres a ocasiona herida severo na e Sushi Chef A.L., cu a keda afecta. Fiscal a bisa cu tin imagennan di camera cu ta mira con e sushi chef a resulta herida y cu Torres mes a declara cu el a tira e boter.

Pa cu e castigo, Fiscal a bisa cu e ta tene cuenta cu e tempo cu a pasa promer cu e caso a bin dilanti. Fiscal a exigi pa T.M. 230 ora di trabao pa comunidad, 3 luna di prison condicional cu 2 aña di prueba. Tambe Fiscal a exigi pa T.M. paga e demanda di daño di parti di e koki di 13 mil florin.

Pa N.Williams., Fiscal a exigi 176 ora trabao, 1 luna di prison condicional y 2 aña di prueba. Pa K.Wever. y C. Williams., Fiscal a exigi 148 ora di trabao, 1 luna di prison condicional cu 2 aña di prueba.

DEFENSA DI ABOGADONAN    

Abogado mr. Peter Mohamed a bisa huez cu e no ta haya legalmente proba cu su cliente  N.Williams a tira boternan y stoel. El a pidi huez pa como tal pa declara su cliente liber di esakinan.Abogado mr Rozenstand (abogado di e otro ruman Williams  esta C.) ta haya cu e castigo pa su cliente no ta husto. El a mustra cu pa K.Wevr. y C.Williams., Fiscal a exigi e mesun castigo siendo cu C.Williams a tira solamente 2 mokete y un boter y a sali bay. E abogado ta haya cu si compara esaki cu loke K.Wevr. a haci, e no ta husto.

Ora cu a cuminsa cu e defensa pa e sospechoso Wever, e prome abogado Abogado mr. Reinkemeyer a bisa cu e problema a cuminsa na un club nocturno caminda tabatin discusion entre N.Williams y K.Wever. Ora Wever a dicidi di bay, e la haya boter di cerbez den lomba, tira door di e homber C. Na opinion di e abogado, N.Williams. no a laga e asunto na solamente un discusion sino a bay tras di K.Wever. na Azeia. Segun e abogado, K.Wever. a purba evita tur cos. El a bay cu su grupo Azia sinta te patras. Y cu ta e rumanan Williams a bay Azia y N.Williams. a dal K.Wevere. di trinsion. E momento ey pelea a cuminsa. K.Wever. a mira N.Williams. coy un boter grandi y menaza di tira. K.Wever. a dicidi e ora di coy un stoel y tira esaki riba N.Williams. Esey tabata momento cu e trahadornan di Azia a gara N.Williams. y sak’e for di restaurant. E abogado ta haya cu K.Wever. no ta culpable di violencia publico. E ta haya cu K.Wever a tira e stoel pa defende su mes y e hendenan cu tabata cun’e. E ta haya cu e stoel no a wordo kibra pues no por papia di destruccion tampoco. El a bisa huez cu un condena lo por perhudica K.Wever. su trabao di seguridad na aeropuerto Reina Beatrix.

Abogado Reinkemeyer a bisa cu Torres tabata presente na e club nocturno tambe y a mira tur loke a pasa. Torres a mira N.Williams coy un boter y kier a tir’e den direccion di K.Wevery otronan di VIP. Pesey el a tira boter pa defende su swa. Mr. Ruiz a cay aden y bisa cu no por mira riba video, si loke Torres a tira, ta esun cu a dal e Sushi Chef. E abogado ta haya cu mester declara Torres liber tambe. Nan a mustra cu un castigo lo perhudik’e den su estudio. Mr. Ruiz ta haya cu ta dificil pa determina un daño inmaterial. No tin raport psycologico y tampoco tin relato medico. E ta kere cu den un caso mas profundo lo por bay determina esey. Huez a cera e caso y lo dicta sentencia dia 21 di April proximo.