Caso di agresion entre yiunan di dos politico a tene huez hopi ocupa

ORANJESTAD – E caso di violencia (aggression) entre yiunan di dos politico local, entre nan e yiu di prome minister di Aruba Evelyn Wever Croes, a tene e huez su man hopi ocupa dialuna mainta. Despues di a pospone e caso dos siman pa motibo di e.o. ausencia di un di e sospechosonan Williams y e pareha di ruman di yiu di prome minister (e pareha di e ruman tambe ta sospechoso) di e otro sospechoso K. Wever, e caso a tuma lugar dialuna mainta trempan. Rapidamente a bira conoci cu e caso cu lo mester tabata uno basta ‘simple’, a bira un dolor di cabez. E lo mester tabata ‘facil’ den sentido cu tabatin suficiente material di video di e suseso pa establece ken a haci kico ki ora y na unda. Pero esey no tabata e caso, a resulta despues. 

E CASO

E caso mes ta data for di 14 di November 2021 ora cu un discusion anterior entre e partidonan, a bin termina den un restaurant conoci riba Palm Beach (Azia Restaurant), cu a laga un hende herida, y varios cos destrui den e restaurant. Na tur, a surgi 4 sospechoso (dos pa cada banda) unda cu a denuncia otro pa violencia, y uno cu a demanda pa daño y perhuicio. Ta trata di e sospechoso K. Wever (yiu homber di prome minister Evelyn Wever, pareha di su ruman muher, esta e homber di fam Torres Mendez’, y e rumanan C. y N. Williams, yiu hombernan di e politico y comerciante Micheal Williams. Si inicialmente tabatin intencion pa ‘soluciona’ e caso internamente entre famia y unda cu cada uno ta ‘castiga’ nan respectivo yiunan y cubri gastonan di daño pa nan cuenta respectivo, esaki a termina den un caso completo den corte, unda cu mester tabatin seguridad extra pa sigura trankilidad den corte. 

SEGURIDAD

Na comienso di e caso caba, por a sinti un tension entre e partidonan, y cu ambos partido no tabata bay ria pa otro, y tabata tira palabra pa otro dado momento. Mirando e escalacion den tension, dado momento, di 3 miembro di Cuerpo Especial Arubano den e sala pa percura pa seguridad necesario, esaki a bira 4 y bin aumenta te na 6, unda cu mester a ubica nan (personal di CEA) strategicamente den e sala, pa evita cu e sospechosonan por a agredi otro fisicamente. Fuera di esey, tabatin tres agente policial completamente arma den tribunan publico (y den e gang durante breaknan), pa atrobe sigura cu no tin problema di posibel aggresion den corte. Cada bez e personal di CEA mester a hala atencion di e sospechosonan den sala y na algun momento a menasa di saca nan afo, incluyendo familiarnan di e sospechosonan. 

CONTRADICCION 

A bira hopi cla durante e curso di e mainta, cu tabatin versionan hopi diferente di otro di e mesun incidente, y ni cu e presentacion di video, esaki no lo a bira mas cla (a resulta despues). Ora cu huez a cuminsa trata e caso, e la duna cada sospechoso e chens pa splica den nan propio palabra, kico a pasa, mientras cu e tabatin nan declaracion inicial di polis despues di e interogacion inicial ora cu e incidente a sosode na 2021. Un di sospechosonan (actualmente studiando na Hulanda), a laga sa cu e no a keda cla pa haya liber di scol pa ta presente. E huez a indica cu posiblemente esaki ta pasobra e sospechoso no lo kier a bisa e scol e motibo ral pakico e tabatin mester di e dia liber pasobra e ora e lo mester a bisa cu e ta un sospechoso. “Y porta e no kier a bisa e scol cu e ta un sospechoso (di ley)” e huez a bisa. Esaki lo por tin consecuencia pa e hoben e ora. Asina mes huez a opta pa sigui cu e proceso, sin e declaracion di e sospechoso ey. Ta trata di e ‘swa’ di Wever, esta Torres Mendez. 

IRITACION Y SEGURIDAD

Tabata ora cu huez a duna cada sospechoso chens pa conta nan ‘version’, e cos a bira tenso den sala unda cu mas personal di CEA mester a reforsa e demas coleganan, ya cu mientras cu un sospechoso ta conta su version, e otronan tabata rabia y agita pasobra segun nan, esey no tabata e version corecto. Specialmente e rumanan Williams no a ria pa e huez y constantemente tabata pidi huez palabra pa aclarea cosnan. Y e huez local tabatin hopi pasenshi y tabata maneha e situacion di tal forma cu e por a de-escala e tension. Gritonan manera ‘Mi no ta kere den husticia’ y cu ‘ta trata di persecusion politico’ y ‘cu dentro di Ministerio Publico tin un organisacion criminal mas fuerte cu pafo mes’, tabata situacionan cu e huez mester a de-escala cada bez. “Boso ta trek conclusies loke cu boso kier pa hende kere” e sospechoso C. Williams tabata bisa tambe den corte. Dado momento un di e rumanan Williams a te hasta cuestiona e rapport di polis, unda cu tabata custiona e valides di e declaracion haci, y cu e no lo a firma esaki. Y tabata sigui un discusion entre e huez y e sospechoso: Dus bo ta yama e polis un gañado” tabata loke huez tabata puntra e sospechoso Williams. 

PROCESVERBAAL

Prome, e huez a repasa e procesverbaal, dunando e observacion di parti di polis, pa despues haya e version di e sospechosonan, y despues mira e video y wak si e declaracionan ta cuadra cu loke ta wak riba e videonan. Segun e informacion compila, tur cos a cuminsa ora cu e grupo di e sospechoso Wever a drenta e restaurant Azia e anochi en cuestion y a bay festeha e cumpleaños di su pareha y mas amigo, den e seccion di VIP. Ora cu polis a haya un melding di un caso di bringamento, a acudi na e sitio, y topa cu un lugar cu un trahado herida, un lugar cu varios destruccion, y hende limpiando e loke a keda atras. Declaracion di e supervisor di e lugar a declara cu anochi 3 homber a drenta e lugar y cu nan lo a bin cerca un amigo. Como cu e la kere cu nan tabata forma parti di e fiesta di W, e la laga nan pasa. Diripiente e la tende boroto, y a busca security. E mes no a wak loke a sosde pero si cu tabatin hopi cos cu a keda kibra, manera glas, botter, lampi y cu hopi cliente a core sali na careda sin paga nan cuenta. Alavez e sushi chef A. Hernandez a keda herida na sub rasa. 

SOSPECHOSONAN

Despues e sospechosonan a duna nan declaracion. Cada uno a conta un version di e suseso. Loke a resalta ta cu mientras tin 4 sospechoso, a bira cla cu e problema tabata entre e sospechoso Wever y e sospechoso N. Williams, y cu esun cu lo tabata e agressor causando daño na un trahado, tabata e pareha di e ruman di Wever esta Torres. Loke a resalta tambe di e versionan, ta ken a agredi ken. E sospechoso N. Williams ta sigura cu e la drenta e restaurant pa bay come, y despues a wak e sospechoso K. Wever los algun palabra cu a pone cu e la bay atende cu Wever y lo a pushe y pase un canti man. E ta sigura cu e no a dal e un mokete. “E tabata manera un actie reactie” N. Williams a sigura e huez. Despues, Williams ta sigui conta, cu e la sinti mokete cay riba dje cu a pone cu e la busca manera pa sali. 

Ora cu a bin momento pa e otro ruman Williams (C.) papia, esaki a protesta pa e forma con cos tabata bayendo y tabata visiblemente altera. E la bisa e huez pa puntre, y e lo contesta, pues pa keda riba e punto. Hopi cos cu huez a puntre, e la sigura cu e no ta corda kico e la haci. “Mi no ta corda kico mi a haci. Mi no a haci nada” e la bisa e huez. “Mi no a coi un botter, mi no a mishi cu ningun hende. Mi no ni conoce (refiriendo na Wever)” e la sigui bisa. Aki ta un di e momentonan di alteracion cu e personal di CEA a cay aden pa separa nan mas for di otro (nan tabata sinta practicament banda di otro riba un rei dilanti huez), pa evita cu nan por a agredi otro den sala. 

K. Wever su declaracion tambe a causa alteracion. Wever ta sigura cu ta e rumanan Williams a bin pe pa dal e, siendo cu e no a haci nada y no a bati boca ningun momento. E la sigura huez cu enberdad ora cu e la haya e mokete, e la tira un stul riba nan (rumanan Williams) pero pa su defensa contra posibel tiramento di botter, y pa proteha su hendenan. 

VIDEO

Despues a huez a ordena fiscal pa mustra e imagen di videonan di seguridad unda cu a purba mustra e incidente for di por lo menos 5 diferente angulo di camera, cu lo mester a clarifica tur cos. Sinembargo a bira conoci cu esaki a empeora e cos aun mas, den bista di e sospechosonan y nan respectivo abogado. Loke tabata hopi visto pa e fiscal di kico a sosode, tabata causa indignacion cerca e sospechosonan y nan abogado. Dado momento tabatin hasta discusion entre e huez y e fiscal pa loke tabata nan interpretacion di e loke a pasa pero despues nan a bin compronde otro. Constantemente mester a pone e video den ‘slow motion’, pa frame pa frame, saca afo kico a pasa. A cuminsa analisa pida pa pida, con e pianan di e sospechoso Wever tabata poni, te na e man di e ruman N Williams pa wak si tabata un mokete e la saca pa Wever, of si ta un ‘simple’ canti man. Tambe pa determina ken ta esnan cu a tira boter, y na ken nan a tira. Of si e la keda na menasa of no. Dado momento abogadonan mes mester a bula aden pa controla nan clientenan, of pa reclama e fiscal y huez pa  sea para e video, pone bek of pa wak e un biaha mas. Tabata visto cu cada partido, tabata wak e video cu otro wowo y tabata interprete den nan forma. Un cos si a resulta cu tabatin bringamento, y con bo tabata mira tur hende den e lugar, (particularmente turista), sali na careda di e lugar, y cu tabatin un chaos completo den e lugar y cu tur cos a pasa den cuestion di algun minuut. 

KICO AWOR

Mientras cu tur hende a haya nan chens di bisa algo di e video, tabata visto cu ta keda na e huez, cu tin e ultimo palabra pa dicidi a base di loke e la wak, hunto cu e declaracionan di e sospechosonan y e defensa hiba di e abogadonan, pa dicidi kico realmente a sosode y ken tur mester haya un castigo den e caso aki. Tur esaki a pasa den e prome parti di dia, y despues di merdia, mester a sigui e rekisitorio di e fiscal y despues defensa di e abogadonan pa cu nan clientenan. NOTA: E compilacion di potret ta di archivo di noticiacla di e prome dia cu mester a trata e caso dos siman pasa, pero cu a keda posponi pa awe. Riba e potret ta falta e ruman N. Williams y sospechoso Torres, cu no tabata den corte e dia ey.