Plasterk: Aruba ta acepta traha cu CFT na bon of na malo!

DEN HAAG – Aruba ta bay traha cu, y acepta College Financieel Toezicht (CFT) na bon of na malo. E pasenshi di Hulanda a caba y esaki ta e mensahe cu gobierno di Aruba lo haya diabierna awor di conseho di minister di reino. Na e ocacion ey lo presenta e Algemene Maatregel van Rijks Bestuur (AMvRB) na gobierno di Aruba. Esaki NoticiaCla.com por a confirma awe mainta. E mensahe ta cu sea Aruba ta acepta CFT den forma voluntario pa , of ta haye obliga pa tume den forma ‘obligatorio’, cu tur su consecuencianan. Y unabes cu Aruba ricibi e medida aki, e tin dos siman tempo pa reacciona ariba.

REACCION

De hecho, gobierno di Aruba, -via su minister plenipotenciario na Hulanda-, a haya e concepto di e protocol aki caba dos siman y mei pasa. Den e asina yama ‘aanbiedingsblad’ (mira e blad aki), conseho di minister di reino ta wordo pidi pa presenta e protocol aki na gobierno di Aruba, cu e peticion pa Aruba reacciona mas tarda, 8 di mei proximo. E forma con Aruba lo reacciona, ta determina cua protocol Hulanda lo ehecuta e ora.

CONCEPTONAN

E prome concepto di e protocol ta basa riba articulo 38 di statuut, cu ta indica cu Aruba ta coopera a base ‘voluntario’ pa yuda y acepta CFT, y asina CFT ta haya su legalidad completo valido pa funciona na Aruba. Si Aruba no coopera y anuncia esaki ( y protesta pa dia 8 di mei), Hulanda lo impone e concepto di protocol cu ta basa riba articulo 51 di e protocol, cu ta esun cu a uza pa tanto St Maarten y Corsou.

NO A CUMPLI

E motibo pa cual Hulanda ta actuando asina, ta pasobra Aruba no a cumpli cu palabracionnan haci durante e reunion di conseho di minister di reino dia 12 di december 2014, unda cu lo a bay di acuerdo cu ta duna CFT un forma mas structural di funcionamento cu pais Aruba. Sinembargo ta mira cu Aruba no tin un ‘draagvlak’ pa por sigui ehecuta e acuerdo aki, no obstante e palabracionnan haci di dia 12 di december ultimo. Un di e puntonan ta tambe cu ainda Aruba no a presenta un miembro cu mester representa Aruba den CFT. “E falta di un areglo structural di CFT na Aruba, ta haci cu e trabounan di CFT, su independencia y e publicidad di esaki ta den wega aki”, segun e pensamento di gobierno di Hulanda.

REACCION GOBIERNO

Den un reaccion cortico pero sigur, minister di finanza di Aruba, Angel Bermudez a bisa "Na e momentonan aki, ami no ta na altura di e desaroyo aki!". Mas e no a bisa, 

PASENSHI

NoticiaCla.com a raporta caba recientemente cu tanto pasenshi di Aruba como esun di Hulanda a caba riba e asunto di CFT, y cu ambos ta trahando den ‘nan bienestar’ pa remedia e situacion. Na e ocacion ey, a raporta riba e pasenshi di e minister di Aruba cu a caba, ya cu e kier tin su tempo pa dedica na belasting y douane completamente. Algo cu e no por haci awor, pa motibo di e debacle continuo y ‘eterno’ entre Aruba y Hulanda riba e ‘supervision’ financiero. E pasenshi di Hulanda awor ta cla y lo pone Aruba dilanti algun decision abrupto y cla, y cu mester keda cla den un tempo defini.