Aruba y Hulanda ainda ta diferencia di opinion riba e RAFT y lo negosha otro siman

ORANJESTAD – E desacuerdo entre Hulanda y Aruba pa loke ta e supervision financiero pa Aruba ta continua pa loke ta e ley di Reino (Rijkswet Aruba Financieel Toezicht of RAFT) cu Aruba no ta sinti cu ta necesario pa tin, pero Hulanda si ta sigui insisti. “Riba e tema aki nos ta na mesa ainda” prome minister Evelyn Wever a declara diahuebs mainta den un conferencia di prensa, confirmando asina cu riba e tema aki ainda Aruba y Hulanda no a haya otro. Mes momento e mandatario a confirma tambe cu e asunto aki ta acopla na e pago bek di debe cu Aruba tin cu cumpli cu ne na October di e aña aki. 

NEGOSACION OTRO SIMAN

Otro siman diamars Aruba ta continua na mesa cu Hulanda durante e bishita di e mandatario (pa e.o. firma e Onderlinge Regeling tambe unda cu si tin acuerdo) hunto cu su colega Maduro cu e negosacionan pa loke ta e RAFT, cu intencion di logra posiblemente refinancia esaki y si por, te hasta haya parti di dje como un ‘regalo’. Aruba no tin e placa aki aworaki (916 miyon florin) segun prome minister pa paga bek na October y como tal tin cu yega na un areglo di pago. Segun e mandatario, Hulanda ta keda insisti cu e RAFT mester bin, y aki cos ta ‘pega ainda’. Ta spera cu otro siman por sali afo y cu por anuncia un acuerdo pronto tambe riba e tema aki.