Barconan Venezolano tin hopi rekisito pa cumpli cu ne prome nan bin Corsou otro siman

WILLEMSTAD - Ayera promé minister Gimar Pisas huntu ku Minister di Desaroyo Ekonómiko sr. Ruisandro Cijntje (di forma virtual) a reuní ku representantenan di KUP (Kooperativanan Uní di Peska) i KIPKO (Kooperativa di Piskadónan Importadó di Piska di Kòrsou) riba nan preokupashonnan pa ora ku frontera di Venezuela habri. E piskadónan lokal tin miedu ku ta habri porta p’e piskadó venezolano i sera p’esun lokal. Esaki ta despues di publikashon di preokupashon di e piskadónan den nos edishon ku a sali ayera. Na e reunion tabata presente tambe ekspertonan di Duana, MEO i AZ.

Segun informashon ku nos tin, e piskadónan a keda informá den e reunion ku frontera ta keda habri dia 3 di aprel, i no t’asina ku manera frontera habri dia 3, e promé barkunan ta yega Kòrsou. Gobièrnu a informá e delegashon ku gobièrnu a stipulá riba kuater (4) A-4, eksigensia ku e venezolanonan tin di kumpli kuné, promé ku bin Kòrsou. Ademas ta bai permití solamente 4 barku ku piska di Venezuela for i 4 barku di fruta di Venezuela bin Kòrsou. Pero esaki lo sosodé despues ku nan kumpli ku tur eksigensia, miéntras tantu esnan di Kòrsou por sigui buska piska for di Venezuela. Gobièrnu a tuma preokupashon di tur e piskadónan pa bai traha riba nan. Entre tantu e piskadónan lokal por sigui traha normal. Tambe Gobièrnu a bisa di a tuma e proposishon pa eksportá piska pa bai evaluá esaki. Segun e piskadónan, e reunion a kana den bon ambiente.

E piskadónan i empresarionan ku tin hopi sèn hinka den e struktura peskeria na Kòrsou, a sali satisfecho for di e reunion ku gobièrnu.

Di parti di gobièrnu a indiká ku durante di e reunion tabatin oportunidat pa e representantenan di KUP i tambe KIPKO por a trese tur nan preokupashon, komentario i sugerensianan dilanti. Despues a laga kada un di e instansianan gubernamental duna splikashon riba e proseso pa ku habrimentu di frontera i tambe kua ta tur e kondishon i proseduranan ku a pone pa por habri frontera entre Venezuela i Kòrsou.

Gobièrnu di Kòrsou su meta ta pa komunidat por gosa di preisnan favorabel i alabes krea oportunidat pa nos mes hendenan por sigui hasi negoshi. E kambio ku ta bai tin ta ku mester apliká lei manera debe ser i alabes organisá i regulá tur esakinan. Finalmente Promé Minister sr. Pisas a palabrá ku e representantenan di KUP i KIPKO ku lo bai analisá e puntonan ku a keda trese dilanti intenamente pa despues bolbe sinta un biaha mas ku e dos gruponan aki. NOTA: E texto ta scirbi den Papiamento fonetico di Corsou.